No Apay nga Umad-adun Dagiti Aglablaba nga Ilokana

Agyamantayo ken ni Doc. Maylem, ti other-half dagiti agassawa nga autor iti “Dear Doc” a kolum iti Bannawag. Ken agyamantayo iti Ilokana, maysa a maestra, a nagsaludsod no kasano ti aramidenna tapno kanayon a mapnek wenno agalimpatok wenno ag-orgasm.

Ket no apay nga immadun ti aglablaba nga Ilokana, basaenyo ti pinagtiponko a dua a bilang ti Bannawag (Mayo 7 ken Mayo 14, 2012 a bilang)-- ngem please, gumatangkayo latta, kadakayo a lallaki, para kadagiti assawa wenno gelprenyo:

Aniat’ Aramidek Tapno Kanayon a Mapnekak?

Dear Doc Gener ken Doc Lorna,

Agtawenak iti 39, siaasawa ken addaan iti maysa nga anak. Nagasawaak a nasapa ta agtawenak laeng idi iti 20. Naabusoak idi agtawenak iti 18. Mapampanunotko a diak kayat idi ti seks gapu iti napalabasko. Pimmusay ti immuna nga asawak iti aksidente iti lugan.

Kalpasan ti tallo a tawen, nakikabbalayak iti lalaki a natataeng ngem siak iti tallo a tawen. Ket manen, nalabit gapu iti napalabasko, saanko unay a naganas ti nakiinnala iti asawak, wenno diak pay ket kayaten ti makiinnala. Nagangayanna, nagsinakami iti kabbalayko.

Ngem iti idadatengko iti arinunos ti maikatlo a dekadak, naaddaanak iti maikatlo a kabbalay a naub-ubing ngem siak ken nakaak-aktibo iti seks. Masansan nga aginnalakami. Diak masinununo no ti napadasak a panagganas ket isu ti kunkunada nga orgasmo wenno alimpatok. Mariknak a bayat ti panaginnalami, kaslaak la nayakar iti sabali a lubong— nakakitaak kadagiti asul a raya. Iti ababa a pannao, no sero ti nariknak a ganas kadagiti dua nga immuna a lallaki iti biagko, napanen iti sangapulo.

Ti pakaseknak ita, kayatko koma a kanayon wenno tunggal makinnalaak ket mariknak a kaslaak adda iti sabali a lubong— kas iti narikriknak kadagiti naglabas. Mabalinyo kadi ti mangted iti tips tapno maaramidko daytoy?

Agyamanak la unay kadakayo nga agassawa ta napintas ti panangilawlawagyo kadagiti topiko iti kolumyo. Adu met ti maad-adalko isu a sapay koma ta manayon pay ti biagyo ken nasalun-atkayo a kanayon tapno maitultuloy pay daytoy kolumyo.--Ms. Margie O ti Solano, Nueva Vizcaya

Dear Ms. Magie O,

Agyamanak iti suratmo. Makitkitak ti kinaliday ti seksual a biagmo agingga a nasarakam ti lalaki a nangpis-it iti “on” iti seksual a biagmo. Malaksid a paset daytoy ti panagbiag, napateg a masigurado a maaramat a nasayaat it seks, ken kasta met a mananam ti imnasna.

Kas kenka, adu dagiti mamati a saanen nga agbaliw ti panirigantayo iti seks kalpasan ti kas iti nagdalanam a pannakaabuso. Ngem kinapudnona, agbaliw daytoy bayat ti panaglakay wenno panagbaket, ken kanaig daytoy ti panagbaliw met ti panagtalek iti bagi, salun-at, dagiti in-inumen nga agas, ken uray ti mismo a kapareha. Ket sika, kas indibidual, mabalin a sika ti mangipamuspusan.

Sumagmamano a babbai ti di makaammo no ania ti orgasmo wenno alimpatok. No makariknaka iti pannakalmes iti pannakarelaks, mabalin a daytoy ti kaipapananna, ket saanmo met a naabot no ti panagriknam ket “nabitinka.”

Tapno matungpal ti kalkalikagumam a naynay a panagalimpatok wenno ti mapnek iti imnas, masapul nga ipamuspusam daytoy. Masapul a managtakuatka ket ammuem no ania ti nasayaat a para kenka.

Kabayatanna, adtoy ti sumagmamano a balakad tapno maragpat ti orgasmo wenno alimpatok:

• Takuaten ti panaganges. Kaaduan a babbai ti mangtengngel iti angesda no asidegen ti panagalimpatokda a dida mapupuotan. Ngem ti nauneg a panangibulos iti anges ti ad-adda pay a mangparasuk wenno mangdagdag iti panagalimpatok. Adda met dagiti babbai a mangibaga a nalaklaka nga agalimpatokda no agasug wenno kayatda ti agriaw. No mariribukanka ta amangan no mariing ti anakmo, padasem ti agasug a nakaapput iti pungan. Agasugka no mariknam a makatulong tapno ad-adda pay nga agganaska. Adda dagiti babbai nga agasug no asidegen nga agparuar ti lalaki tapno ad-adda pay nga agganas daytoy. No naipakadawyanen kenka ti panangtengngelmo iti angesmo no asidegen ti panagalimpatokmo, agpraktiska a siksika a mangibulos iti angesmo, ken agasugka. Kadaanan a teknik ti 15-20 a panaganangsab wenno panangkamat iti anges sa mapasarunuan iti atiddog a panangibulos iti anges. Ulitem daytoy iti mamitlo kabayatan nga asidegkan iti alimpatok wenno panagorgasmo.

• Papigsaem dagiti piskel iti mabagbagim. Bayat ti yiisbom, pagsardengen ti panagayus ti isbo, bulosan sa manen pagsardengen— ip-ipitem dagiti piskel nga agtrabaho bayat ti panagalimpatok. No ngamin pagtignayem dagiti piskel iti mabagbagi no kasta a saanka nga umis-isbo, ti piskel iti rusok ken kutit ti maipit wenno mapakessen.

Ti panagpraktis bayat ti yiisbo, dita a madlawmo a maus-usarmo dagiti piskel iti mabagbagim. Ngem dimo unay sansanen ta amangan ket no maimpeksionka met. Ngem mabalinmo nga aramiden daytoy bayat ti panaglablabam, kas pagarigan.

Inton mapraktismon daytoy, mabalinmo nga ipit-ipiten dagiti piskel sa pagrelaksem sa direkta met a sagidem ‘tay aw-awagantayo iti clitoris. Mabalinmo nga aramiden daytoy bayat ti panaginnala— tunggal sumrek ni lakaymo, agrelakska, ket no rummuar, isu met ti panangipitmo.

• Padasem dagiti baro a posision. Ad-adda a mangpaalimpatok daytay palikudannaka ni lakaymo. Wenno padasem met a rabawan isuna a nakatugaw. Daytay sanguenna ti alas-sais idinto a sanguem met ti alas tres. Wenno agiddaka ket ingatona dagiti sakam sa agparintumeng iti sangom. Ipitem dagiti piskel iti kutitmo sakbay ti ipagarupmo nga asidegem ti panagalimpatokmo.

• Pagsaritaanyo ken ti doktormo ti maipanggep iti agas. Adda dagiti agas nga anti-depressants ken anti-hypertensive a mangapektar iti orgasmo dagiti babbai. Side-effect dayta. Isu a dakamatem iti doktormo no bilang agus-usarka iti kakastoy nga agas tapno masolusionanna.

• Masapul nga agpimpinnategkayo iti kapareham. Napateg daytoy ta no agpimpinnategkayo la unay, saankayo nga agbimbinnain ket nakatartarus ti agus ti panaginnala no kua. Laglagipem a no ania ti aramidenyo iti uneg ti kuartoyo a kas koma iti kasla mabisbisinan a panaginnala, palimedyo daytan ken lakaymo. Adun dagiti panagadal a manmano nga agalimpatok dagiti babbai kadagiti kasual laeng a seks wenno ‘tay kunkunada a one-night stand.

• Agbalin a managamiris. Ad-adda a magun-od ti pannakapnek iti seks ken iti relasion no amirisentayo dagiti kaparehatayo. Mangtakuat kadagiti wagas a maparagsak isuna kasta met a suplian ti panagkalikagumna a maparagsaknatayo. No agpadakayo a nakaturong ti imatangyo iti ar-aramidenyo, nagangganas ti panaginnala ket sigurado a magaw-atyo ti “langit.”

Sapay koma ta adda naadalmo iti diskusiontayo. Basta tagiragsakem laeng ti ar-aramidem ket dimo pampanunoten no aniaka wenno dagiti parikut iti biag. No makainnala, bay-am nga agari ti biolohikal a kababalin a kasapulan iti seks ken iti yaalimpatok.

Ngem saan met a kasapulan a tunggal makiinnalaka, masapul nga agorgasmoka. Nasayaaat ketdi a naynay a pampanunotem a masapul a maalam dagiti benepisio iti pannakiseks. Ti panangalimpatok ngamin, isu daytoy ti maysa kadagiti tulong ti nakaparsuaan tapno makapagrelaks ti tao. Adu dagiti maipaayna a nasayaat iti salun-at a kas koma iti panangagasna iti sakit iti ulo ken pangpaimas iti turog. Laglagipen met a ti orgasmo, ad-adda a pasam-iten ken pamarisenna ti ayan-ayat.

Dios ti agngina ti panagsuratmo. No adda pay salusodmo ket mabainka a maisurat iti daytoy a kolum, mabalin met yemailmo kadakami (Doc Gener) iti gdmaylem@yahoo.com.

--Doc Gener and Doc Lorna

Kabayatanna, adda man nasuratko a daniw gapu iti daytoy a kolum ni Dr. Maylem. Panagkunak, mabalin daytoy iti isagsaganami a libro a napauluan Alimpatok.

Adtoy man:

Tunggal Aglabaka, Dungngo

Gapu ta sika ti silaw daytoy a pagtaengan

idinto a siak ti adigi— mabatika

a mangiwanwan idinto nga agsapulak

iti pagbiag, panagkunak, tunggal aglabaka

laeng a malaglagipmo dagiti kanito a kukuata laeng:

kas iti daydi kaarigmo ti aso a nagalang-ang

ta siak ti uleg a nangsippit kadagita sellang

ket kas subadmo, nagangawannak a binekkel

nga ad-adda a nakariknaak iti kinatalged

saan a panangigalut wenno panangibalud

ta nalabit, nasanaymo iti inka panaggelgel

no kasano ti panangingariet tapno ti mureng

isu laeng ti maikkat— mabati ti lupot a nadarisay

maktanganka ammok iti inka panaglaba

ta tunggal dumtengak ken duduata

agpasaklotka kaniak

malaglagipmo ti alas tres

a panagsegsegga

idinto a malaglagipko ti alas sais

a segseggaak ti oras a panagawid

no kua kasla ubingka nga aghinete kaniak

no dadduma, sutilenka met

     siak ni mannalon a mangtimon

     sika ni nuangko a naandur

ti pagyamyamanak

uray nabannogka nga aglaba

maisaganam dagiti pagaayatta

a taraon— agsinsinnubota pay

a kunam la no mano aldaw

a dita nangnangan

kangrunaanna, uray saantan

nga agsarita iti balikas

mapnektan nga agtinnugmok

    mata iti mata

    dakulap iti dakulap

    barukong iti barukong

    kaunggan iti kaunggan

    kararua iti kararua

iti agpatnag a kasla awan patinggana

iti ikub ti pagtaengan a binangonta…

(Mayo 3, 2012)