Kadkadua

Illustration credit:  lilianedevries.com

Nalabit, iti abay ti bubon iti sirok ti santol

Iti likud ti arubayan a dumna iti kataltalonan

Nga inkali ni tatangko ti kadkaduak

(No apay a dimi pulos nagpatpatangan

Siertok a gagangay kadagiti Ilokano

Saan a mapagpapatangan ti sagrado,

Ketdi maiparparikna, madaydayaw

Maitaltalimeng iti isip ken lagip

Paset a panagkunak awan makagamsaw)

Ta tunggal manglagipak, dayta a disso

Ti umuna nga agparang-- nakamarmaris
Kas iti maysa nga aldaw a sinirsiripko
Ti rupak iti nalitnaw a danum
Iti labes ti nakaun-uneg a sipnget
Adda sadiay ti asul a langit--
Iti sanguanak, iti likudak
Nupay pagaammok nga uray no tumapuakak
Wenno tumayabak, diakto pulos madanon


Sangkatangadko dagiti langitko ditoy siudad
Wenno sangkamatmatko dagiti bagi ti danum
Ngem pulpulos a kasipngetan ti makitak
Malaksid kadagiti mangmatimati a naglalaok
Nga agkidmakidmat a bituen ken nakukudrep a silaw
Ket mapampanunotko a no laeng koma maidasayak

Wenno agsubliak iti pagtaenganmi

A maysaakon a karkarma, mapampanunotko

Nga agaonak manipud iti danum nga agpangato

Sa agampayag nga aglikawlikaw

A mangsubli kadagiti disso ti panagubingko

No saan man, nalabit, nagrupsan ket naitiponen

Iti danum sa iti angin sa iti lagip, sa iti karkarma…

Hulio 16, 2012