KAS ITI NARSAAK A RANGAW DAGITI MAISKO

 i.

masiudotak a kanayon nga agdardaras

no apay ketdi a naimbento ti panagdardaras

kamkamakamek a kankanayon ti oras

kankanayon a mangkimkimkim iti kepkepko nga anus.

no kuan mikismikisek daytoy mangliwengliweng

nga abut ti siudad, kas man agnanayon a sikukursong

kas kadagiti sakak: intartarayanna ti tarindanum ken tambak

wenno dagiti kinelleng a nakairaepan ti kinakurapay ken saning-ik.

diak latta maalaw ti riknak no apay a makilinlinnetletak

iti siudad a nakaigayunggayongan ti diak maalut-ot a sakak

pasaray agkupit ti sentidok iti kakakamakam

kadagiti agsasala nga alikudog dagiti kasla lungon a lugan.

 

tayabek koma ti pagobraak no agbalinak a billubillo

ngem masarakak ti bagik iti dung-aw ti di maung-ungpot a pila

ti naynay a madadael nga mrt— malagipko ti adu pay a pila

ti pagutangan, pagbuniagan, pagbayadan ken pagtayaan lotto.

no koma adda paglakuan kadagiti masaysayang nga oras

no kastoy a diak maabotan ti kamkamakamek nga oras

di koma saanak a kasla natnag a pimpiman iti dagumpo

ti diak marabrabsut nga irut ken irteng ti trapiko

kabayatan a naidarekdekak iti edsa: agmalmalangaak,

kasla pukpukkawannak nga agawid ti pinanawak nga ilik

kasla agur-uray dagiti agdaldalluyon a pul-oy ken dayyeng

kasla agur-uray dagiti kari ken karit ti siiiliw a kinelleng.

 

ii.

ngem ita a sirsirigek manen dagiti tambak

a nagnaak itay inasakko daytoy minaisak.

rumpiis ti ulimek dagiti aggango a bulong

sikekemka dagiti natay a sikog dagiti salapi

sililisay man dagiti naunnat nga arrabas

a nagappupo iti di aggibus a kinakawaw—

mangliwengliweng ti ngatangata a dumpaag

a dumaknir iti arsadanan ti naabbatan a waig.

kasla al-alia dagiti naglabas a kalgaw

a dagiti gurami, paltat, tilapia, dalag ken sisiaw

awanda man ita a mabanniitan wenno kalinlinnibeg

dagiti maipalubnak koma a nuang bayat nga aggibus ti tikag.

 

adda leddaang ti sidadalutaytay ken silalabus a kataltalonan

adda dagem a sangalsangalen dagiti nanglaylay a barsanga,

katsumba, dumpari, kuantong, dukayang ken bakbaka

kutkutimanda ti umel a sennaay ken dung-aw

ta uray dagiti managsapsapa a kari ti linnaaw

awan ta awan ita a masimsim a kalasag

a manglasat iti daytoy makautoy a kalsada ti waw.

ket bayat nga agmulmulenglengak, a sungsungkaek

ti puonak: bukel, abono, krudo, pestisidio, pinanangdan, arak

agling-etak iti nakalamlamiis a sumriam nga agramaram iti durik

idinto nga agal-alipaga ti darang ti apagalasnuebe a bigat

naapirasko ti rupak, kas iti narsaak a rangaw dagiti maisko.

 

--DANIEL L. NESPEROS

 

(Umuna a Gunggona iti Salip iti Daniw ti 1st Saniata Prize iti 2015. Dagiti Hurado: Cles B. Rambaud, Roy V. Aragon ken Ariel S. Tabag.)

Comments

Popular posts from this blog

VOICE TAPE

ARIEL SOTELO TABAG

Samiweng ni Ayat