ATANG ITI SARUKANG: MUTIA TI KADKADUA

Mailukip latta dagiti kortina ti gukayab ti kutimermer

Ket di magawidan ti makipinnerreng iti raya ti init

Nga impasngay ti nakakayang a langit: gumteb—aggiteb

Ti pitik ti biag iti saklot ti nagdalungdong iti nakasinsin-aw

A lamiis: isikial dagiti ramay dagiti dakulap iti sep-ang

Ti punganay: ket masdaawda iti agpitpitik a sangapirit

A bara ti bukel ti kaimudingan— kadagiti murdong-tarumamis

Dagiti rimmurog a sanga a nalettay iti panawen ti ruros,

Mapursing dagiti kristal a sabong nga inwarakiwak ti law-ang

Ket in-inut nga agdissoda iti lukong ti dakulap ti umang-anges a daga.

            Agkarayam

ti ramay ti raya...

                        Tunawenna

ti kimmalukop a sipnget—

Ket aggilap

ti isem ti malukaisan

                                                A puso ti aggurgurigor

a parparmatam...

Ayaunayen, aya, ngaminen ti iliw ti kannag iti agpatnag

A pakayaw-awanan ti saniata dagiti kumarkarayo nga isem

Alep-ependa ti naidumduma nga ayat iti tukot ti ules ni ganas

Ket iti panagareng-eng ti mito ti gargari, in-inut met nga agari

Ti nakaim-imeng a salaknib ti kinatao: maipauyaoy ti appan ti sulisog

Iti kimmampuso a lipnok nga inyinaw ti kulukol ti yelo iti puseg ti luy-ong

Ti nagaburan a karayan ti biag— ket iti idadawi dagiti sibibiag a lasag

Maibawes ti sagut ti sag-ot a namuli pay idiay adayo a daya a timmaudan

Ti puli ni kayumanggi: ti an-annongna, agdakdakiwas tapno sapulenna

Dagiti atang iti sarukang iti kuppokuppo ti kastilio a niebe: gaw-aten

Dagiti timmulang ken agtigtigerger a ramay ti balangat ti agkutkuti

A sangaduyog a gawed ken bua; arak ken muskada— maklaatda la ketdi

Ta uray gayam ditoy ganggannaet a pagkammaulawan, adda ingel ken bileg

Ti mangalngal a pinadis: pagtalnaenna ti aggargaradugod a bituka

A nabayagen a mangsapsapul iti raman a nakairuamanna.

            Di man ketdi maaluadan, piman

            Ti panagkuy-os ti barukong

            Iti panangtangad kadagiti nababaked

            A bantay a nagdalungdong iti puraw

            A lamiis: kumutukot iti kaunggan

            Ket adda kullayaw a parnuayen

Ti nadangkok a rissuod— batibat

Ti igaburna iti sakaanan

Ti dati a dalumpinas a nakapasagan

Dagiti bantay a dumadangadang:

Naatap sa man latta ti diro ni ayat

Ti nakaem-emma a mutia ti saligemgem?

Ngem kitaem: wen, buyaem man ketdi dagiti agtinnag manen

A sabong ti arapaap: in-inutda a maiwarakiwak ken umarakup

Kadagiti rimmurog a sanga ti pimmusay idin a pinuon,

Ket mainaw ken maanninawan:

Kadagiti kaippasngay

nga agsapa—

ti kalilibnosan

pay laeng nga imahen

ti puraw a sabong

ti nakaparsuaan:

mutia ti kadkadua.

 

--PRODIE GAR. PADIOS

 

(Maika-2 a Gunggona iti Salip iti Daniw ti 1st Saniata Prize iti 2015. Dagiti Hurado: Cles B. Rambaud, Roy V. Aragon ken Ariel S. Tabag.)