Presidenteak iti Segunda Palanca Club!

AKUEK nga idi damok ti makisalip iti Palanca Memorial Awards for Literature wenno am-ammo ti dadduma a Palanca, awan ti agay-ay-ayam iti panunotko no ania ti maangay iti awarding. Basta kayatko laeng idi ti mayabay iti nagan dagiti id-idoluek a mannurat.

Ngem kalpasan a napadasak ti dimmar-ay iti awarding idi 2003 gapu iti panagsegundak ken ni Apo Reynaldo A. Duque— iti dayta a tawen nga inyalatna ti Hall of Fame— inkarik iti bagik a mangabakakto manen.

Agasem ta agarup makitam amin sadiay dagiti agkakalaing kada agkakalatak a mannurat a Filipino. Ken agarup maramanam amin sadiay dagiti agkakaimas a potahe. Ken agarup adda amin sadiay a kita ti mainum— soft drinks ken nasanger.

Ti adatna, nagsasaruno nga awan ti nagam-udak kadagiti simmarsaruno a tawen— 2004 agingga iti 2007. Kasla met la inlunoddakon dagiti arak ken luto nga ar-araaran ken tinawen a pagpappapasan da Miks ken Manong Johnny. (Diak latta ibagbaga ti apeliedo ken pudno a nagandan tapno maprotektaran ti dayawda. Pagsidsiddaawak ngamin idi no kasano a makapanda iti tinawen idinto ta di met kanayon a mangabak daydiay dakdakkel, ken daydiay pudek, di met makikonkontes. Gayam, imbes nga agsuratda iti ikontesda, matdada la sumapsapul iti sursurotanda a nangabak wenno nag-judge ta sigsigurado kano! Adda pay ketdi sayangguseng a lumayaw iti alad ti kosina ni Miks a kas ar-aramidenna idi idiay Norte.)

Isu nga inlalaingkon. Ay, ket nangabakak iti nagsasaruno a Second Prize iti 2008 agingga iti 2010. Kinaasiannaka laeng ti gasat, Boy, kasla kunkuna daydi itemtemplaak iti kape. Ngem ania koma. Naas-asi pay, a, ti gasat kadagitay agpepers.

Naidumduma ti kinaragsakko. Siempre, malaksid iti pasken, makarikna met datao iti panagpannakkel iti bukod a gapuanan.

Itoy Setiembre 1, 2010 ti ninamnamak a kagarbuan ta isu ti maika-60 a tawen ti Palanca. Ken iti pannakiuman kaniak ti pannakabagi ti Palanca, naammuak a pinilida dagiti amin nga adda iti Hall of Fame-da tapno aghurado.

Espesial daytoy, nakunak.

Ngem saan a kas iti ninamnamak ti naimatangak. Ta iti isusungadko, awan ti brass band a simmabat. Gagangay nga adda red carpet ta five-star hotel ngarud ti Manila Peninsula.

Gagangay nga adda dagiti nadumaduma a kameng ti media a mangkober iti nasao a pasken. Ngem awan ti naidumduma iti registration malaksid kadagiti inyeksibitda a plake ken tropeo a naammuak kalpasanna a binulodda kadagiti Hall of Famer.

Pagsayaatanna, naipatugawkami ken baket iti medio likud ken panipngeten, apagisu kadatao a rantana a talaga ti makidaya.

Nakaay-ayat ta dagiti nakalamisaanko, kapadpadak met gayam a nakapamin-anon a nagsekon: ni Joey Baquiran, ni Ferdinand Jarin, ni Jerry Gracio, ken ti balasang nga inrantak a lipaten ti naganna tapno awan ti pagat-atapan ni baket. Informal la ket ngarud a nabukel ti grupomi a Segunda Palanca Club. Siak kano ti presidente ta maysa laengen a sekon, maysaak metten a Hall of Fame iti Second Prize.

Nakadidillaw nga immababa ti lamisaan a nakaidayaan dagiti taraon, ken bimmassit dagiti klase ti potahe a diak mainaganan ta agpapadada a ganggannaet kaniak.
Sangkataliawko la ket ngarud da Apo Bannawag Editor Cles B. Rambaud ken Apo Saluyot Editor Juan Al. Asuncion ta dandanin maikisap dagiti taraon ngem awanda met laengen. Maibusandan!

Ngem nabang-aranak idi nakitak ida a sumungad. Adda nangukod kadakuada nga usherette. Ket inturongna ida iti lamisaan dagiti kaamaan ti Palanca! Immapay la ket ngarud kaniak a masapul nga aglalaingak ta sabali a talaga ti boss. Maipasango kadagiti mararaem a tattao.

Ngem idi agangay, naasianak met laeng kadakuada ta langada met ngaruden ti mabisin. Kasano ngata ti panagisuboda? Sagbabassit, a, ta masapul met a di maungap nga ania ti ngiwat.

Pagsayaatanna, limmabas iti ‘yanda ni Ricky Davao ket nalabit dinakamatna a duduada laeng ken Vim Nadera, nga agpapaay nga emcee, iti lamisaanda iti asideg ti agdan ti entablado. Simmurotda. Ngem diakon kinitkita ti pannanganda ta amangan no adda masaok a sabali. Basta ti ammok, naemmada la ketdi. Ricky Davao ken Vim Nadera, asino koma dagita, ala man? (Mapukaw ti nasayaat nga aw-awid no boksit ti agkiraid.—Editor)

Diak ammo no Palanca wenno ti Manila Pen ti akin-aramid iti panagidde-iddep ti silaw ken mikropono idi agbitla ni Apo Greg Brillantes a guest speaker. Numona ta pangatiddogen ti mensahena ket di maiparbeng kenkuana ken kadagiti naitallaong no dina makompleto ti mensahena a panagkaykaysa koma dagiti mannurat iti Ingles man wenno kadagiti nadumaduma a lengguahe iti Filipinas.

Ken impasardeng pay dagiti maseknan ti naiparang a drama ta malaksid nga awan ti nalatak nga aktor, makapautoy ken nakaat-atiddog ket mabalin nga agingga laeng iti alas onse ti rabii ti naipareserba ti Palanca iti Manila Pen.



Pagsayaatanna laeng, makapnek met latta ti kinnomusta kadagiti pada a mannurat— kadagiti Ingles nga Ingles, tung-edak lattan a tung-ed. Nakallalagip met ni Apo Nadera ta indariragna manen ti awisna a panagdidinnaniw dagiti Gumiliano iti tarawidwidanna a programa iti Conspiracy Garden Cafe iti Quezon City.

Sa impasarunona nga agpaalaak kano iti nasao a bar. Agingga ita, diak pay tinungpal ti dawatna. Urayenna pay, a, ti pannakaalak iti Hall of Fame iti Palanca. (A.S. TABAG)

(Naipablaak iti Saluyot, ti kagalisan a babasaen dagiti mannurat nga Ilokano, iti bilangna a Mayo-Nobiembre 2010. No kayatyo ti maaddaan iti kopia, agemail iti ariel.tabag@gmail.com ta yemailko tapno saankayon a gumatgatang numona ta nagngina— sagsingkuenta ti maysa idinto a puro anunsio met dagiti kameng ti kaguduana. Lukonanyo la ket iti joke ti e-mailyo nga idonaryo ken ni SPO4 Ticticrubng ta naibusanen iti jokes— puro corny metten ti ar-aramidenna.)


Caption para kadagiti ladawan:
1. Ti autor a nangitangguap iti Gilbey’s Light.
2. No Miss Universe Philippines Venus Raj ti agkalikagum a makikodak, narigat met no di pagustuan. Naala kalpasan ti awarding, nakiragup ni Saluyot Editor Asuncion a di madlaw a bassit ti nakanna. (Permi la ket nga apal ita ni Miks.)