Cabaret

NAGKUY-OS ti riknana idi nagpanti ti babai bayat ti panangkunkunikon ti bagi daytoy a nangkumpas iti “Careless Whisper” idinto a nakapungpungay dagiti matana.

Nagpalagapag sa nagpaswit dagiti agbuybuya.

“Isuot a dagus ti bra!” Adda nangipukkaw.

“Bra! Bra! Bra!” Riaw met ti sabali.

“Isuot na! Isuot na!” Riaw ti sabali pay.

“Suktanyo ngamin ti kanta! Tiempo pay ni Grandma Katrina!”

Nagpapaggaak dagiti agbuya. Naipatangatang ti nasaranta a tugtog. Ad-addan ti riaw dagiti agbuybuya idi imbarawid ti babai iti barukongna ti bra a ginuyodna iti pagisalapayan iti likudanna a nakaisalapayan ti leggings, nighties, spaghetti, palda, bestida, gown…

Ket bayat ti in-inut a panangisuotna dagiti nadakamat nga aruaten kas panagsasaganadda, pumigpigsa met ti palagapag, paswit ken riaw dagiti agbuya.

Ad-adda la ngaruden idi nakasuoten iti gown ti babai. Awanen ti arindenggan. Ken nakatakder aminen a masanguanan dagiti agbuybuya.

Uray isuna.

Timmakder idi dinan madaeran ti riknana. Nagpalabes iti kasilia. Kalpasanna, rimmuaren iti dayta a pasdek.

Awanen ti matatao iti aglawlaw. Manmano metten ti aglabas a lugan.

Nagturong iti waiting shed tapno aguray iti lugan. Adda immasideg a naka-two piece a babai iti abayna. Natukay man met laengen ti riknana. In-inut, bimmangon manen ti adda iti sangona.

Idi makita daytoy ti babai, nagikkis.

Dagus a nagsardeng ti patrol car iti sangona. Sintimek, ginuyod dagiti polis. Ta agdadata a nakataker pay laeng ti adda iti sangona.

Iti interogasion, pinabasolna ti babai. Kinunana a masapul a dagiti nakasuot iti two-piece ti rebbengna a matiliw. Isuda ti mangtuktukay iti rikna dagiti lallaki.

Pinalubosanda met laeng idi limneken a kasla ulo ti pag-ong ti adda iti sangona.

Sakbay a nagawid, dimmagas iti vending machine. Nangala iti sangalidok a brandy, pangpabara iti lamolamo a bagina.#

(Ti adda iti ngato, mabalin a sarita, mabalin a sarilaysay, mabalin met a daniw, mabalin met a joke. Nabulod ti ladawan iti legaljuice.com.)