anibersario

ne, naganasannak metten nga agikabil. hm, daytoy man ti kakaisuna a nagustuan ni dln (tay maysa a paboritok a mannaniw) kadagiti daniwko. naibannawag itay pebrero, para iti aldaw dagiti puso.



sangkabassit a request: no kastoy ti aramiden ti lakayyo, putdenyo diay mabagbagina ta napia a pulotanan ti marabutit, hehe.





anibersario



nagkarita iti nagan ti ayat.



digosek dagiti ubbing iti panagibi:

kasilpo ti panagsikog ken panagaw-awir.

ita nga aldaw a kasilpo met dagiti pekpekkel

ken salidummay iti sardam. nabirtud met

ti maimaldit nga inosente a ray-aw

iti pingping a nalidem a dana itan

ti nabuslon a lua ti parbangon.



nagkarita iti rigat ken nam-ay.



innawak dagiti lamina ti naulimek

a pammigat; bay-ak a sul-oyen

ti lababo dagiti pangrem a nalimogan

iti giteb ti barukong.



lampasuek dagiti naimilkat a kusilap

ti pitak. sagadek ti tapok a nagsusuon

iti babantot ti butuan a dakulap.

ay, makipagladingit ti sagad iti panagsan-ek

dagiti takiag ken gurong.



igabsuonko iti baniera dagiti pagan-anay

ti dang-as ti aircon a garakgak ti opisina

ken bidang ti dinekadan a sainnek

ti kosina. napanaas ti mapirpirsay

a ramay iti rungsot ti chlorox a manggelgel

iti kinatangsit ti lipstick a kimmawiwit

iti kinatan-ok ti puraw a kuelio.



nagkarita iti kinaagnanayon.



no kiwarekon dagiti ramen ti pangrabii,

isagpawko met ti panagugis a naimas koma

ti napait, naapgad, naalsem ken naadat.



agpakadan ti sardam. narnekanen

dagiti ubbing iti lallay a nangbalkot

iti saem. awagannak tapno uksotek

dagiti mediasmo. labaranka iti alimpatok

ti urok bayat ti panagkallautang ti umel

a dung-aw iti kannag a kinilga

ti nayareng-eng a ganggannaet

a birngas ni ayat…