Reberendo

Iwaragawagko ti kinatan-ok iti panagtuok

- kas iti pannakailansa iti krus

wenno pannakaibalud iti agsusukot

a sotana uray sumgiaben ti lubong -

aglemmeng latta ti mabuteng nga alintatao

iti mata dagiti debosionado a domingo

tunggal pespesek dagiti lua ken ling-et

ta aglimogda a dara nga agayus iti kararua

a ganggannaet iti bara ti daga wenno masaek

dagiti murkat ken sikog ta malinay nga ostia

a pangrennek kadagiti didiosen a patron

ti malakaniang.



Ilawlawagko dagiti senial ti daradara

a malem a mangur-uram iti rimat

ti bullalayaw: asidegen ti panagampayag

ti puraw a kalapati a nagpayak

iti balitok a gameng ti puli. Panawen ita

ti panagibtur iti kiraos ken panagrekka

ti lasag; panaglantip dagiti ladingit

ti parbangon ken lua ti sipnget;

pannakaidaya ti biblia iti lamisaan

a kutiman dagiti balo ken ulila

iti sardam a ngilangilan dagiti mabisin

a saltek.



Siak ti mangibabaet kadagiti darepdep:

panaglanglang iti dulang a nakaidayaan

ti rennek; pannakailibay iti abel a naburdaan

iti talinaay; pannakadayas iti linnaaw

a pagan-andapan ti agnanayon. Ngem

petpetak pay laeng ti grasia ta yalamanokayo

iti politiko, ibatekkayo iti lino a nangkagay

iti simbaan, imalditkayo iti leksionario

dagiti natan-ok.



Agbuggoak iti agua bendita ta suknoren

ken lemmesenna dagiti aliaw ken alingget

ken duadua iti barukong. Pakawanendak…



Bannawag, Agosto 2004