Agserbi a rangtay dagiti kultura: NCCA creative industry, naluktan

Tapno maitandudo ti industria ti panagpartuat dagiti katutubo ken tapno makatulong iti pannakaikadakkel ti paglakuan iti produkto dagitoy a naggapu pay iti nadumaduma a suli ti pagilian, nanglukat iti tiendaan ti National Commission for Culture and the Arts (NCCA), kaduana ni Dr. David Baradas, maysa a nalatak a curator ken social anthropologist. Masarakan ti nasao a tiendaan iti lobby ti pasdek ti NCCA iti 633 General Luna Street, Intramuros, Manila.
Proyekto ti NCCA a tarawidwidan ni Dr. Baradas, opisial a naluktan ti tiendaan idi Abril 27, 2009 iti panangidaulo ni NCCA Chairman Vilma Labrador. Panggep ti NCCA Creative Industries a maipamatmat dagiti “di pay naipakpakita a kinabaknang” ti naidumduma a laing. Maysa nga steering committee iti NCCA Management Committee ti mangsiput iti proyekto iti pannakikoordinar ni Josie Maglalang ken idauluan ni Deputy Executive Director Marilou Jacob.
Kuna ni NCCA Executive Director Cecile Guidote Alvarez a ti tiendaan ti agserbi a rupa ti School for Living Traditions ti NCCA ken iti panagsanay dagiti adipen ti arte iti GAMABA (Gawad Manlilikha ng Bayan). Mayannatup met daytoy a One Stop Shop iti poverty alleviation program ta makatulong a mangipaay iti gundaway a pagganaran ken mangipaay iti trabaho kadagiti katutubo nga addaan iti talento iti creative industry.
“Saan a magatang iti sabali a lugar (dagiti produkto),” kinuna ni Baradas. Innayon daytoy nga agilako laeng tiendaan kadagiti produkto a kabaruananen iti langa ken makaawis kadagiti turista.
Saan laeng a tagilako ti kayat nga ipamatmat ti NCCA Creative Industry Shop kadagiti turista no di ket ti nadumaduma a wagas ti arte nga us-usaren dagiti katutubo a nagtitinnawidanda metten iti adu a henerasion.
Agpangpanggep ti grupo ni Dr. Baradas a mangiwayat iti workshop kadagiti estudiante ken mangisursuro, kasta metten ti binulan a panagpabuya (audio-visual) kadagiti tema mainaig iti nasao nga industria kas panangyam-ammo kadagiti umili.
Kuna ni Baradas a masapul a yam-ammo ti pagilian dagiti napimpintas a produkto iti merkado ti lubong ta partuat dautoy ti sirib, kinamanagpartuat, ken tuodanen a tradision. Kasta met a mayam-ammo ken mapadayawan dagiti tattao ken lugar a naggapuan dagitoy naisangsangayan a partuat.
“Maparparmatak a no agtultuloytayo iti daldaliasatentayo a dana, dumur-as daytoy tiendaantayo,” kinuna ni Baradas. (NCCA-Public Affairs and Information Office)

Bannawag, Mayo 18, 2009