Manong Diego In The House (or the ilokano rakenrol project)

Hunio 20, 2012

Ti latest iti daytoy a proyekto, wenno iti Samtoy mismo, inkeddengmi nga agsukatkami iti nagan tapno maikkat ti panakkelen a pressure iti abaga (ta saan nga ang-angaw ti mangimet iti nagan a Samtoy). Daytoy man "Manong Diego" ti insingasing ni Adi Mighty Rasing a baro a nagan ti banda. Nagustuak met. Cool. Matso. Nakail-ilokano (ta adda la ngaruden manongna, adda pay ni Apong Diego Silang). 

So, put your hands in the air, dudes. Manong Diego in the house.

Ti Samtoy bayat ti panagtokarda iti Danirak (rock poetry) iti Mag:net Cafe (nangrikepen) iti Katipunan, Q.C. idi Agosto 31, 2010. Agpakanawan: Ariel S. Tabag (baho), Melvin Ramos (tambor), Mighty C. Rasing (mikropono), Dick Francisco (gitara). Manamnama a dagitoy met laeng ti mangtokar kadagiti kanta iti baba, karaman ni Jox Maranion iti keyboard. Dida pay narugian ti nagirekord kadagiti kanta iti baba gapu ta awan pay makukuartada.

ONE FOR THE ROAD
Music: Asseng/Dick
Words: Asseng

Verse 1
One for the road manen, gagayyem
Nalpasen ti trabaho nagmalmalem
Iruarmo dagiti baso a kumalangiking
Iruarmon ti kilawen a kalding
Apo, nagimasen
Alright, men!

CHORUS PART:
One for the road,
‘Ta pinapaitan, itakalmon
‘Ta basit’ Piddig, itagaymon
Ania pay ngarud, one for the road
One… for… the… road!

Verse 2
One for the road manen, kakadua
Panawen manen ti liwliwa
Awan ti sinnangit ketdi katkatawa
Awan ti loser, winner ti adda
Apay kapuy?
Alright, tira!

Verse 3
One for the road manen, aatanud
Daytoyen ti padaya for the boys
From barangay to municipal road
Provincial road, zigzag road
Farm to market road
Amin a road!


-----------

BARIBARI

Baribari, tagtagari
Ti madalapus, durgi (2x)

Ti agsida't sili, magasangan
Ti agiggem pariok, mauringan

Ti táo a mannaríta,
Awán ti ania a magapuánanna.
Baribari, Apo!

Baribari, tagtagari
Ti madalapus, durgi (2x)

Maruam ti agmamanok
No dimo lagdaan ti ikub

Kalubam ta sidaem uray bugguong
Saan laeng a pusa ti agkakallong
Baribari, Apo!

Baribari, tagtagari
Ti madalapus, durgi (2x)

Ti bassít a káyo nalaká a lintegén,
ngem no dakkél narigáten.

Uray nagbalayka iti bato no naimutka agpaaginaldo
Atiwmo pay ti nagmansion a sunggo

Baribari, tagtagari
Ti madalapus, durgi (2x)

Tay áso a taul a taul
Saán a makakagát ken makadunor.

Uray kasano a riri
Masurot latta pagayatan ti ari
Baribari, Apo!

Baribari, tagtagari
Ti madalapus, durgi (4x)

(Dagiti berso ket pagsasao dagiti Ilokano ken sumagmamano nga aporismo manipud iti nobela nga “Oh, My Candida” ni Joel B. Manuel. Na-edit dagitoy tapno mayataday iti kasapulan ti danirak.
Musika ti Samtoy a buklen dagiti sumaganad

Mikropono: Mighty C. Rasing
Baho; no dadduma acoustic a gitara: Ariel S. Tabag
Gitara a dekoriente: Dick Raphael Francisco
Amin a kita ti tambor: Melvin Ramos
Beatbox: Joker Maranion)


_____________________________________



UMAYKAN, NAKKONG, DIKA AGBATBATI
Inkur-it ni Ariel S. Tabag
Musika ti Samtoy (Mighty, Ariel, Dick, Melvin)


Apagpasngay ti bannawag, riniing ti umuna a sangitmo ti lubong.
Nayabay kenka ti Biblia, diksionario, buli, sensilio, bawang.
Ta dilam, napatedtedan iti tubbog ti paria—
Impekpekkelda ti panio a nayapros iti Apo Baket ti Piat
Ket sinagid ti anghel a kasigudmo dagiti bibigmo.
Pinasgedan ni amangmo ti anglem, ket tinapayana ti banga
Nga ayan ti kadkaduam— ingkalina iti puon ti narra.
Sa intag-aynaka iti daya tapno buniagannaka ti sinamar,
Sa kinunana:

Umaykan, Nakkong,
Dika agbatbati (2x)

Kinamatmo ti anniniwanmo kadagiti tambak ken barikir
Inaprosam ti balbag ti tangatang kadagiti dan-aw ken karayan
Rinukodmo ti nagbaetan ti daga ken langit
Tinagikuam ti wayawaya dagiti pagaw ken kannaway
Dagiti maris ti bullalayaw, naimalditda kadagiti matam
Insuro dagiti nagannakmo ti umno a wagas ti Nakaparsuaan
Inted dagiti nagannakmo ti lubong ket nagnaedka
Ngem agnanayon nga anakdaka iti lasag, isuda ti pagtaengam
Ket kunada:

Umaykan, Nakkong,
Dika agbatbati (2x)

Sinukisokmo met ti lubong kadagiti panid ti pagadalan
Ket natakuatam nga adda nagdumaan ti maris ken sanikua
Adayo ti nagbaetan dagiti nakurapay ken nabaknang
Adu ti nagdumaan dagiti awanan ken addaan
Kukuanak ti pagilian, naynay a kunam, kukuadak dagiti umili
Anaknak met ti pagilian, naynay a kunam, anakdak dagiti umili
Ket nagnaedka kadagiti away, kadagiti eskuater, kadagiti bakir
Dagiti nagannakmo, masansan nga ur-urayendaka, mangnamnamada
Aw-awagandaka:

Umaykan, Nakkong,
Dika agbatbati (2x)

Naim-imbag kadi a mayadal iti naganus nga utek ti kinamanagimbubukod
Tapno panunoten laeng ti bukod a pagimbagan, ti bukod a pagnaaran?
Naim-imbag kadi a maisuro a ti lubong pagsasalipan laeng a tay-ak
Ket umisu lattan ti di panagpapatas, ti di panagkikinnammaysa?
Dagiti nagannakmo a nangisuro kenka kadagiti wagas ti kinatan-ok
Nabatida a mangkutkutim kadagiti lua a gunggona ti kinatan-okda
Ta saankan nga agawid, awankan iti unibersidad, awanka met iti bakir
Awankan, awankan, awankan, awankan, awankan, awankan…

Bridge Adlib:

Ngem aw-awagandaka latta…

Umaykan, Nakkong,
Dika agbatbati (2x)


------------

AWANEN

Chord Pattern: D-Bm-A-G


Aw-awagak dayta naganmo
Ta nariingak nga awanka’t sibayko
Ngem agallangogang daytoy timek
Ta awanen ti kaduak no di ulimek

Refrain:
Madawis piman 'toy panunot, rikna
Ta awankan a nagyanda a kakaisuna

Chorus:
Anian, aya, a ranggasmo
Anian, aya, nga ulpitmo
Pimmanawka a di man la nagpakada
Uray man ket no ibagam koma
Uray man ket no iparupam koma
Nga awanen pulos panagayatmo

Tangtangadek dagiti bituen
Ngem awankan, Biagko, nga agrimat
Ulsakon daytoy lamiis
Ta awanen kaatag no di lagip

(Uliten ti refrain ken chorus)
Adlib
(Uliten ti refrain ken chorus agingga a mauma)


----------------


AMMOM KADI
Words and Music: Asseng

Ammom kadi a nasursurokan
A lipaten a namimpinsan
Awanen ti saem a mariknak
No malagipka tunggal sardam

Uray man no lukibem
Daytoy nay ulok

Ammom kadi nga imbaulkon
Daydi ladawam a pinartuatko
Awanen ti daniw a masurat
Uray agparangka’t tagainep

Uray man no ukritem
Daytoy nay pusok

ADLIB

Ammom kadi nga inyaronkon
Daydi trahe a pagbodam koma
Awanen a pulos pagilasinan
Nga inayatka iti uray la

Uray man no damagem
Itoy insukatko kenka

Ammom kadi a nasursurokan
A lipaten a namimpinsan
Awanen ti saem a mariknak
No malagipka tunggal sardam

Hunio 17, 2012

---------------


NAIM-IMAS TI MARUNGGAY NO MAAL-ALAAN
Daniw ni Cles Rambaud
Musika ni Ariel S. Tabag


D-A-G-D
Naim-imas ti marunggay no maal-alaan
Bulongna ti umub-ubing no mapapaadan
Sumam-it a kas 'ti isem nalasbang a balasang
Uray digonat' di malangoy ti agabalayan

Napas-eng ti marunggay a di magatgatudan
Iti bangkag puonna awan makaassibay
Mulat' Manang Baak agdannat' nakaliktad
Taraken ti Manong Bayog ayatnat' nagatad

Naim-imas ti marunggay no maal-alaan
Puonnat' di naremmengan, bunganat' masukdal
Nananam kas tubbog susot' agdalagan
Sustansianat' balon ti agarado, agpalpal

Nakulbet ti marunggay a di magatgatudan
Bulongnat' barrakabak, binalayan ti aplat
Digonat' naangseg, bungana pay makaulaw
Maganggango, matintinnag, di pay mataltaliaw

D-A-G-D
Naim-imas ti marunggay no maal-alaan...



____________________________



DIAK MAN MAAWATAN
Balikas: Asseng
Samiweng: Asseng/Dick Francisco

Intro: EM7-AM7 (2x)

 EM7              AM7           G#m            C#m7
Diak man maawatan no apay a nagpartak
A             C#m7            DM7               B
Ti kanito no addaak iti sibaymo, O Ayat
EM7              AM7           G#m            C#m7
Diak man maawatan no apay a manglangeb
A                 C#m7        DM7            B
Ti tangatang no ta isemmot’ mailinged


KORO 1
              E     AM7         E-AM7
Ngem maawatak, O Imnas,
       E           AM7     C#m7              B7
Rimat ta matam, agsapak a di manasanas
    C#m7               G#m
Ditoy barukong, ilalaenka
  A           F#m-B7                     (Aramiden ti intro)
Ta sika ti sabong nga agsampaga

EM7              AM7           G#m            C#m7
Diak man maawatan no apay nga agayamuom
 A                C#m7                DM7               B
Ti aglawlaw no kumpasam lung-ay ti pul-oy
EM7              AM7           G#m            C#m7
Diak man maawatan no apay nga agdalluyon
A                 C#m7        DM7                    B
Ti sabangan no agdayyengka iti parbangon

(Uliten ti Koro 1)

Bridge:
A        B              E             C#m-C#m7
Ay, uray aniat’ ipaaramidmo
  A              F#m  F#m7    B-B7
Maawatak amin, O Ayatko
A      B           E                    C#m-C#m7
Ta sika laeng ti dungdungnguek
A          F#m            A                    B-B7
Iti amin nga aldaw, amin  a panawen

Adlib:
E-C#m-C#m7-A-B-B7 (2x)

KORO 2

         E     AM7         E-AM7
Wen maawatak, O Imnas,
       E           AM7     C#m7              B7
Rimat ta matam, agsapak a di manasanas
    C#m7               G#m
Ditoy barukong, ilalaenka
  A           F#m-B7                  
Ta sika ti sabong nga agsampaga

(Uliten agingga nga in-inut a kumapsut sa malpas)


____________


LINGLINGAY
Words and Music: Asseng

Intro: G-C (4x)

G-C
Linglingay, linglingay

Em D
Sikat’ rimat layap
Em D
Mutiat’ sabunganay
Em C D
Urayenka, Biagko, a sumangbay

Chorus:
G-C
Linglingay
Sikat’ ragsakko
O Linglingay
Yeah
Linglingay
Sikat’ bagnosko
O Linglingay

Filler: G-C (4x)

Em D
Sampagat’ kalgaw
Em D
Mata ti littugaw
Em C D
Pasantakem, Biagko, ‘toy aglawlaw
(Repeat Chorus)

Adlib: G-C (8x)

Coda:
G-C
Lalalalala lallay, Linglingay (10x)
Linglingay (fade)


Hunio 15, 2011


___________


ILOKANO
Words: Asseng
Music: Asseng/Dick

Intro: A-G- A-G - A-G- A-G -A-G pause

A-G-A G
Gayyem, nangngegmo kadin ti samiweng
A-G-A
Kadagiti bantay ken turod, karayan ken angin

G-A-G-A-G

A-G-A G
Nagimnasen a denggen ayug ti panawen
A-G-A
Aglagto dagiti ubbing, agdayyeng ti amin

PRE-CHORUS:
G-A
Ipukkaw iti sangalubongan
G-A G
Ikansion iti agnanayon

CHORUS:
A-G-A-G
Ilokano, umili ti lubong
A-G-A-G
Ilokano, puli a naandur
A G
Ilokano, Ilokano
A-G-A
Bin-i ti kinaagnanayon

A-G-A G
Uray sadin ayan timuden dayyeng ti puso
A-G-A
Agtartaray ur-uratmo dara ni Ilokano

BRIDGE:
Bm A G
Sarangten ti nadawel a taaw
Bm G A-G
Danonen ti gameng iti bullalayaw

ADLIB
PRE-CHORUS
CHORUS

--------------------------