Adobo a Balut

Nakitak iti naminsan daytoy iti pinterest account ni Atanud Roy V. Aragon. Ket gapu ta umapalak man iti madama a mapaspasamak a "Panagkayas iti Balikas" (read: pannakalektiur ken pannaka-workshop dagiti kameng ti Mangngaggo Club ta naatiwda iti napalabas a salip iti sarita ti ALVIYA Literary Foundation) idiay Sanchez Mira, Cagayan, napanunotko ti maysa a pulotan a mayannatup iti maysa a mangasseng a mangngaggo.

Pasensiakayon ta medio nalidem ta daytoy la selponko met piman ti pinangkodakko sa diak pay naedit iti Photoshop met. Ngem ti nasken ket makitayo no kasano a linutok, aya?

Adtoy man:

Lima a balut laeng. Narigaten no masobraan. 

Medi pay lat' tumangad iti barsanga.

Siempre, ukisan dagiti balut.

Manggalipka met 'ta lasona. Sa mangpitpitka 

'ta bawang. Naim-imas no dagitay aggapu't Pinili-- 
agorder laeng ken ni Mareng Aileen.

Mangipapudot iti mantika iti pariok. 

Igisar ti bawang. Sa ti lasona. Ipanmon 'ta balut. 

Warsiam iti napitpit a pimienta. 

Sa buyatam iti kalalainganna a toyo wenno soy. 

Kalubam met, a, pakalutlutuanna. 

Kalpasan ti dua a shot iti empelyte, 
subliam ti lutlutuem. Paaruyotam iti suka-- 
naim-imas no 'tay suka nga impasurot 
'tay aglaklako't balut ta naadat daydiay.

Hm, dayta-- nagbanglo, nagnanam.

Naimas a parisan iti aglingling-et a red horse
a kuna ni Tanud Dexter Fabito. Ngem no awan
ti red horse, agkarameyot latta 'ta empelyte.