Kastan

Kaano kadi nga agammusayak manen?
Makapamuriot met ti masansan nga agkukot
Kadagiti nalalam-ek a banga ken pariok.

No adda maidaw-as, idiayam kadi ti pilay
A monoblock? Wenno ti agranranitrit a katre?
Punasam kadi pay ti basar a tinulawan
Ti dara a nagbitin iti panti ken palda,
Ken pitak iti daydi parbangon a naslepka,
Nangkamkamat iti anges, nagsangsangit?

Sagadem kadi dagiti bettak ti sarming
Ken ti dapo ti pinuoram a ladawan?

Nangngegmo kadi ti ballaag ti sirena
Wenno awan ti bibiangmo iti ambulansia
Ken iti lugan a mangbombomba iti uram
Iti eskuater, ken iti barukong dagiti aktibista?

Nasaksiam kadi idi lamuten ti pangamaen
Iti kaariping a kuarta ti balon a dinardaraan
Ken puto ti balasitang a sinursuruam
Nga agbilang iti bituen ken rimat iti dara
Iti tunggal eskinita nga agturong iti kalsada
A dinaliasat dagiti natan-ok ken bannuar?

Kalikagumam kadi ti panangabungot kenka ti sipnget—
Di masigurado nga iti panangipagarupko, kasla sakit
A masukisokto pay laeng ti umisu nga agasna?

Umat-atiddog ti burbor ken ipusko
Tumadtadem dagitoy ngipen ken kuko
Ditan agsasao
Ngem uming-ingpisen ti nagdumaanta.

Ballaaganka sakbay a pumanawka
Ken agbayanggudaw— masansan a mabisinak
Diak met ngarud kayat nga agdikkumer lattan
Daytoy nabatbati a kinasimbeng
Ditoy nailet, nasipnget, nakarugrugit a siled.