Sika, Kamia iti Dakulapko

Sika ket kamia iti dakulapko iti agnanayon, kinunak kenka
Ngem perperrengek ti dalipato daytoy nalam-ek a sardam
A kas man nagtagilangaka dita kalpasan a nauram dagiti ladawan
Ti kinaubingta— naisangrat iti panagrupsa ti lagip nangruna
No kas iti kanser a mangkibkibkib iti lasag, suknorenna ti puso,
Ti utek ket diak mabalabala no kasano nga agepak ti linnaaw
A kaasping dagiti luam. Ngem apay met a no sutilen ti angin ti temtem,
Lemmesennak ti salemsem a nangdilpat kadagiti labus a dapan
A nagdaliasat, nangrukod iti nailet ngem nakalanglangto a lubongta?

Sinurotta ti lawag ti kabus kadagiti urit ti sampedro; imbatokta
Ti dudukot ti kalgaw iti ray-aw ti dan-aw; binilangta iti dakulap
Ti tunggal maysa ti kari ken namnama dagiti bunubon; impabulodta
Iti bambanti dagiti katkatawa a mangbugtak iti kinasulpeng
Dagiti billit-tuleng; binordaanta ti aglawlaw kadagiti arapaap;
Inkitikitta kadagiti kayo, bit-ang, tambak, law-ang ti patempategta.

Saanta a bannatiran wenno tukling nga agtawataw iti adayo
A kinelleng ta ditoy Gullasing, awan pagpatinggaan ti paraiso.
Patayabenta ti ullaw tapno ikannawagnan ti nalabon nga apit,
Saan ketdi a tapno a tannawaganna pay dagiti sabali a lubong.

Pabasolek kadi ti nakaparsuaan no inyaspingnata iti bulong ti algarrubo
A kalpasan ti ritual ti panagkeppet— dumuklos ti kasaor— maregreg
Tapno pabaknangenna ti daga? Wenno puon ti bagbag a dupirdupiren
Ti alinuno agingga a rumukma a gabat ket surotenna dagiti sabong
A paseten ti nakalawlawa a taaw? Agrusing ti bulong ngem iti sabali
A langto, iti sabali a sanga. Ket dagiti sabong, mabalin nga agminarda
Iti bullalayaw nga iti laengen mata a matagikua, iti apagdarikmat.

No kas itoy temtem laeng ti maysa nga aldaw, isagutko ti bakir,
Ukkonek dagiti garami wenno uray taep ken dagiti ruot, agparintuodak
Iti init iti uray sangkaballing a rissik tapno laeng agnanayon ti lawag.

Ngem saan… saan.

Kamiaka iti dakulapko, mabalin. Ngem nagramutka iti dakulap
A mangtaptapaya kaniak, kadata, iti amin. Ket diakon marukod
Ti maymaysa a turod nga ayanmo ta eternidad itan a nagbaetanta.


(Naipablaak iti Bannawag, Nobiembre 10, 2008 a bilang. Nabulod ti ladawan iti acoupleofartists.com.)