1st Premio Asseng, Maikadua a Lawas ti Salip iti Kurtis

Kablaaw ken ni Jobert M. Pacnis ti Ballesteros, Cagayan a naputongan (manen) kas Kumukurtis iti Lawas iti maikadua a lawas ti 1st Premio Asseng, Salip iti Kurtis, babaen ti kurtisna nga:

Adda ‘toy tilapia

A nangalun-on ‘ti alinta

Permi kulipagpagna:

Napnek!

Napili ti kurtisna manipud kadagiti sikret a bilang ti kurtis a naisalip iti alas otso iti agsapa ti Nobiembre 12 agingga iti alas singko iti malem ti Nobiembre 16, 2012. Daytoy ti maikadua a gundaway a nabalangatan iti Kumukurtis iti Lawas ni Pacnis, awan mabalin, a, ta kas kuna ni Apo Reynaldo A. Duque, “Why punish the excellent?”.

Dagiti dadduma pay a finalist:

Immapon ni bunog

Iti nakanganga a kappo

Immisem a nagkaem

Nabsog (Alexander Rafanan Yago)

Araduek ‘ta bangkag

Natikagan, mabisibisan

Immuneg nga immuneg

Nalpas (Ferdinand C. Cortez)

Inkautkot’ ramay

Napula, nakeppet a ngiwngiw

Nagsubli adu a daras

Tunglab! (Jefferson M. Somera)

Tilapia ken dalag

Nagbinnatokanda ‘diay lubnak

Nagkinnulipagpagda.

Nalpas! (Rolando A. Seguro, Jr.)

Iti umuna a gundaway, inako ni Asseng a narigatan a nagpili kadagiti naisalip a kurtis ta nagbuya pay iti Rated R a pelikula sakbay a kinednganna dagiti kurtis.

Umawat ti Kumukurtis iti Lawas iti Php50.00 a load ken sertipiko ken no adda gasgasatna, adda nayonna inton gibus ti bulan ti salip (aglalaban dagiti mapili nga uppat a Kurtis iti Lawas para iti Kurtis iti Tawen) idinto a dagiti uppat a finalist, umawatda iti sag-20 a load (bassit pay laeng ta awan pay makukuarta ni Asseng).

Mangrugi ti maikatlo a lawas ti Salip iti Kurtis itoy alas otso ti Nobiembre 19 ken aggibus no alas singko iti malem ti Nobiembre 23. Dua a kurtis ti mabalin nga isalip ti tunggal kumukurtis.

Para iti ad-adu pay nga impormasion, siripen ti pakarsoniasseng.blogspot.com, wenno i-like ti facebook.com/assengest. (asseng met laeng)