1st Premio Asseng, Maikatlo a Lawas ti Salip iti Kurtis

Kablaaw ken ni Prof. Ferdinand N. Cortez ti Tuguegarao, Cagayan a naputongan kas Kumukurtis iti Lawas iti maikatlo a lawas ti 1st Premio Asseng, Salip iti Kurtis, babaen ti kurtisna a:

Dimteng ‘tay dalluyon

Timmal-o dakkel a gammarong

Tinarayna ‘tay abut—

Limsot.

Napili ti kurtisna manipud kadagiti sikret a bilang ti kurtis a naisalip iti alas otso iti agsapa ti Nobiembre 19 agingga iti alas singko iti malem ti Nobiembre 23, 2012.

Dagiti dadduma pay a finalist:

Naummong linnaaw
Naguyas kadagiti bantay

Naputtot iti penned—

Pimsuak! (Jobert M. Pacnis)

Piniritpiritko

Dinilpatak a nagngarietan

Inyusokko’t abutmo—

Simrek. (Alexander Rafanan Yago)

Wen, kasta, pagduaam

‘Dim unay petpetan, relaks la’ng

‘Ton sanaykan, paspasam—

Ala! (Derick Marcel F. Yabes)

Indriboldribolko

‘Toy nakatangtangken a bola

Sa insiutko nga insiut

Nabtak! (Rolando A. Seguro, Jr.)

Umawat ti Kumukurtis iti Lawas iti Php50.00 a load ken sertipiko ken no adda gasgasatna, adda nayonna inton gibus ti bulan ti salip (aglalaban dagiti mapili nga uppat a Kurtis iti Lawas para iti Kurtis iti Tawen) idinto a dagiti uppat a finalist, umawatda iti sag-20 a load (bassit pay laeng ta awan pay makukuarta ni Asseng).

Mangrugi ti maikapat ken maudi a lawas ti Salip iti Kurtis itoy alas otso ti Nobiembre 26 ken aggibus no alas singko iti malem ti Nobiembre 30. Dua a kurtis ti mabalin nga isalip ti tunggal kumukurtis.

Kas nadakamat iti ngato, aglalaban dagiti uppat a Kurtis iti Lawas tapno mapili ti Kurtis iti Bulan wenno Kurtis iti Tawen. Maangay ti seremonia ti pammadayaw inton Disiembre 8, 2012 idiay ALVIYA Mansion, Libertad, Abulug (makisingitkaminto laeng idiay ig-igid, apo). Umawat ti Kurtis iti Tawen iti 200 a load idinto ta awanen ti awatenda dagiti tallo pay a finalist (narigat no maruamda).

Para iti ad-adu pay nga impormasion, siripen ti pakarsoniasseng.blogspot.com, wenno i-like ti facebook.com/assengest. (asseng met laeng)