Salip iti Sarita Mainaig iti COVID-19

Dakkel ti epekto ti angol a COVID-19 iti biag dagiti Ilokano, saan laeng nga iti biang ti salun-atda no di pay ket iti bukodda a pamastrekan ken iti wagas ti panagbiagda. Mainaig itoy, kas paset ti pannakaidokumento dagitoy a pasamak iti biag ni Ilokano iti wagas a piksion, maawis dagiti mannurat nga Ilokano a makipaset iti dokumentasion, babaen ti maysa nga ababa a sarita (short story) a pakailagaan ti rikna, kapanunotan wenno reaksion ni Ilokano maipanggep iti daytoy nga angol.

Isponsoran ni Guillermo Iloreta, tubo ti Sinait Ilocos Sur ken agnaeden iti Sacramento, California daytoy a salip. Uray adda iti ballasiw-taaw, marikna ni Apo Iloreta ti sasaaden dagiti padana nga Ilokano iti naggapuanna a lugar. Nakasaganan nga agbakasion koma iti Filipinas idi Marso, kalpasan ti 36 a tawen a kaawanna iti lugarda, ngem daksanggasat ta bimmallaet ti pandemia a COVID 19. Gapu met iti daytoy, saanen a nakapagbiahe ti eroplano a paglugananna koma. Agingga kadagitoy nga awan pay ti masinunuo a pannakapukaw ti pandemia ken di pay ammo ti eskediul ti panagawidna, itulongna laengen ti dadduma a magastosna koma nga agbakasion kadagiti mannurat nga Ilokano nga agsurat mainaig iti pandemia ken kadagiti makabasa kadagitoy. Patien ni Apo Iloreta a babaen ti sarita, ad-adu ti maawisna nga Ilokano nga agbasa gapu ta maisurat daytoy iti wagas a makaliwliwa. Ket babaen met ti pannakabasada kadagitoy a sarita, maikkan dagiti readers iti naun-uneg a panangimutektek iti sasaaden ni Ilokano bayat ti pandemia a mabalin a mangted kadakuada iti inspirasion, namnama, wenno rikna a makipaset met iti panagbalbaliw a para iti pagimbagan ti gimong a paggargarawanda.

Mapauluan ti salip iti Guillermo Iloreta Writing Contest (Salip iti Sarita iti Panawen ti COVID-19). Marugian daytoy iti Agosto 15, 2020 ken agpatingga iti Oktubre 30, 2020. Imatonan met daytoy ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw.)

Ti kompleto a pagannurotan:

1. Marugian ti Guillermo Iloreta Writing Contest (Salip ti Panawen ti COVID-19) iti Agosto 15, 2020 ken agpatingga iti Oktubre 30, 2020.

2. Silulukat ti salip kadagiti amin a mannurat iti Ilokano malaksid kadagiti asideg a kakabagian ti isponsor ken dagiti mangimaton iti pasalip: ti Guillermo Iloreta Writing Contest Secretariat.

3. Maysa laeng a sarita ti mabalin nga isalip ti tunggal mannurat a makisalip.

4. Dagiti laeng sarita maipapan wenno adda pakainaiganna iti padas ti maysa nga umili wenno komunidad iti pandemia a COVID-19 ti maisalip.

5. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna.

6. Agatiddog ti pakisalip iti 12-20 a panid iti short bond paper, nai-computer (agusar iti Times New Roman, Font Size 12) iti doble espasio ken addaan iti maysa a pulgada a margin iti amin nga igid ti bondpaper. Masapul met nga agusar iti MS Word format.

7. Ti parbo a nagan ti autor ti agparang a naganna a kas autor ti sarita.

8. Ipatulod ti pakisalip babaen ti email itoy nga address: nmevaldez@gmail.com. Subject: Guillermo Iloreta Writing Contest on COVID-19. Nasken a maawat ti Secretariat ti pakisalip iti di naladladaw ngem iti Oktubre 30, 2020. Saan a mairaman iti salip ti entry a maawat kalpasan dayta a petsa.

9. Dua a file ti ipatulod. Umuna ti file ti Entry. Maikadua ti Bionote. Iti Bionote, ilanad ti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag, adres ti agdama a pagnaedan, agraman email address ken numero ti selpon wenno telepono a mabalin a pakakontakan iti autor.

10. Dagiti gunggona: Umuna a Gunggona, Php7,000.00; Maikadua, Php 5,000.00; ken Maikatlo, Php3,000.00. Maipaay met ti Tallo a Consolation Prize nga aggatad iti Php1,000 tunggal maysa. Maipaayan pay dagiti mangabak iti sertipiko ti pammigbig.

11. Saan a mabalusingsing ti pangngeddeng dagiti hurado malaksid no maduktalan a nasalungasing ti Pagannurotan Bilang 5.

12. Makipagtagikua ti Contest Secretariat kadagiti mangabak a sarita nupay adda latta karbengan dagiti autor iti copyright ti sinuratna a sarita. Maaddaan pay ti agpasalip iti karbengan a mangipablaak kadagiti mangabak a sarita iti ania man a wagas a kayatna nga aramaten.

13. Mapakaammuanto dagiti mangabak no kaano ken no sadino a maangay ti seremonia ti pammadayaw.

(Naipaskil iti FB Page ti Bannawag Magazine.)