Awag

(Ken ni Mom C.)

Segseggaak ti awagmo tunggal alas tres iti malem
Nangruna ket basta lattan naputol daydi estoriam
Iti panagsupadi ti bengngat iti komedia
Dagiti i-San Esteban ken i-Candon—
Sangagasut ket uppat a Martes dayta
A linitupan dagiti katawam ti liwliwa nga ididiaya
Ti panaginana a di met ipatagikua ti kapitalista
A pagorasan ken kompiuter.

Agsisilpo ketdi dagiti rinibu nga estoriam:
A makadangran ti napalaus a panagpagus iti nasam-it
A no matnag ti nakangatngato, mabanitog
A dagiti sabsabong, para kadagiti sibibiag…

Ilastogko koma ti katibker ti kimkimpetanmi
A kararag iti pettat nga idadarup ni Ondoy.
Ay, anian a naglamiis ti dakulapna
A nangapros kadagiti dapanmi ken bukotmi!

Wenno amadek no nasaksiam ti panangiwalwallages
Ni Pepeng kadagiti saleng ken sabsabong
Nupay siertok, adda latta dagiti pakpakatawa
Nga imbati kenka ti didigra.

Kayatko ita a panunoten a pettat ti panangawis kenka
‘Tay barom idiay Canada ket ipasarabomto laengen
Ti pagawagmo koma. Wenno inawisdaka
Dagiti taga-Candon ken -San Esteban
Nga iturongmo ti komedia iti panagpiestada.
Wenno nagturista dagiti appokom
Iti nadumaduma a disso ket sika ti bagnosda.

Ta iti maudi a nangngegko a timekmo,
Kabaelam dagitoy.

Ngem nabayag unayen a dika umaw-awag

Nalabit addaka iti disso nga awan bagyo
Wenno ti panagpagus iti nasam-it,
Wenno dagiti nangangato ta agpapadan ti amin,
Ket dita met laeng makapagkinnaawatan—

Isu a segseggaam laengen ti panagkitata manen.

ARIEL S. TABAG
Intramuros, Manila