Iti Tanap ti Cagayan: Immula met ti DepEd ti Bannawag Diamond Jubilee Tree
Ni JIM P. DOMINGO
KAS pannakipagrambak ti Departamento ti Edukasion iti Tanap ti Cagayan iti maika-75 nga anibersario ti Bannawag, nagmula met dagiti opisial ti ahensia iti Bannawag Diamond Jubilee Tree iti mismo a paraangan ti opisina iti Carig, Tuguegarao City. Indauluan da Regional Director Benito S. Tumamao ken Assistant Regional Director Lourdes G. Angoluan dagiti opisial ken empleado ti pannakaimula ti maysa a patubo nga ipil (Intsia bijuga), maysa a primera klase a tarikayo, kalpasan ti maysa a programa iti sanguanan ti kangrunaan a patakder ti departamento.
Kas pannakabagi ti Bannawag, impalawag ‘toy numo kadagiti naitallaong ti kaipapanan ti Bannawag Diamond Jubilee Tree ken ti akem ti magasin kadagiti programa ti Departamento ti Edukasion sakbay ti pannakaimula ti historikal a kayo. Iti ngamin Tanap ti Cagayan ti pormal a nakairubuatan ti pannakaaramat ti Bannawag iti pannakataginayon ken pannakaparangpaya ti lengguahe nga Iluko ken iti pannakapasantak ti kultura ken Literatura Ilokana dua a tawen sakbay a naipaulog ti DepEd Order No. 74 series of 2009 a nangwaswas iti 35 ti tawenna a bilingual policy a nangituyang nga Ingles ken Filipino laeng ti maaramat iti sistema ti edukasion.
Impalagipmi a dua a tawenen ti napalabas idi impaulog ni sigud a Direktor ti Rehion, ni Dr. Jesus Lazo Taberdo, ti DepEd Regional Memorandum No. 116 series of 2007 a nangibilin iti pannakaaramat ti Bannawag kadagiti amin a pagadalan iti Tanap a naisaad kadagiti lugar nga Iluko ti kangrunaan a pagsasaona a kas kangrunaan a reperensia iti pannakaisuro ti Social Studies, pannakaparang-ay ti panagayat iti panagbasabasa dagiti ubbing iti elementaria ken iti sekundaria ken uray pay dagiti agtutubo a saan nga agbasbasa wenno adda iti ruar ti pagadalan.
Dinakamat pay ti bilin ti akem ti Bannawag iti pannakataginayon ti Literatura Ilokana, kadagiti nangangayed ken artistiko a kababalin ken kultural a tawid ni Ilokano. Ket babaen ti panagbasbasa iti daytoy a magasin, mamati ti Departamento a mangted iti di mabilang nga impormasion a mainaig iti sosial, ekonomia ken kultural a panagbiag dagiti Ilokano.
Inar-aramat ngaruden ti Tanap ti Iluko kadagiti pagadalan sakbay pay ti pannakaipakat dagiti agur-uray a linteg ti mother language education a pakaibilangan ti DepEd Order No. 76. Iti pannakaipaulog daytoy a paglintegan, ad-adda manen a mapabileg dagiti gannuat a panangaramat iti Iluko kadagiti pagadalan.
Adun a panagsukisok ti mangipaneknek nga ad-adda nga epektibo ti panagsursuro dagiti ubbing kadagiti umuna a tawen ti panagbasada no agaramatda iti nakayanakanda a pagsasao. Babaen ti panagaramat iti nariingan a pagsasao a maawatan ti ubing, saanna laeng a maipateg ti bukodna a bagi ngem maipategna pay ti bukodna a kultural a tawid. Dagdagus a maawatanna ti leksionna no iti bukodna a pagsasao ti maaramat ket dagitoy ti mangtulong kenkuana tapno nalaklaka ti pannakasursurona kadagiti dadduma pay a pagsasao a kas iti Filipino ken Ingles.
Iti panangaramat iti kayo a simbolo ti panagrambak ti Bannawag, nailawlawag met ti akem ti maysa a kayo a kas maysa a natibker a saksi iti inaldaw-aldaw a panagbiag ni Ilokano. Saan laeng nga iladladawan ti Bannawag dagiti kinapudno iti kulturana, pinarang-ay ken sinibsibogan pay ti magasin dagiti natikagan a paset ti kultura ni Ilokano tapno sumantak ken masaksianto pay dagiti sumarsaruno a kaputotan.
Maysa kadagiti impakpakaasimi ti pannakataripato koma ti naimula a kayo ta saan laeng a tawid dagiti Ilokano daytoy. Pakalaglagipan pay iti natalingenngen a panaglalangen dagiti Ilokano, Ibanag, Itawes, Gaddang, Yogad, Igorot ken dadduma a puli a kankanayon a maigunamgunam kadagiti ubbing iti pagadalan. –O
(Naipablaak iti Bannawag, Nobiembre 9, 2009 a bilang.)
KAS pannakipagrambak ti Departamento ti Edukasion iti Tanap ti Cagayan iti maika-75 nga anibersario ti Bannawag, nagmula met dagiti opisial ti ahensia iti Bannawag Diamond Jubilee Tree iti mismo a paraangan ti opisina iti Carig, Tuguegarao City. Indauluan da Regional Director Benito S. Tumamao ken Assistant Regional Director Lourdes G. Angoluan dagiti opisial ken empleado ti pannakaimula ti maysa a patubo nga ipil (Intsia bijuga), maysa a primera klase a tarikayo, kalpasan ti maysa a programa iti sanguanan ti kangrunaan a patakder ti departamento.
Kas pannakabagi ti Bannawag, impalawag ‘toy numo kadagiti naitallaong ti kaipapanan ti Bannawag Diamond Jubilee Tree ken ti akem ti magasin kadagiti programa ti Departamento ti Edukasion sakbay ti pannakaimula ti historikal a kayo. Iti ngamin Tanap ti Cagayan ti pormal a nakairubuatan ti pannakaaramat ti Bannawag iti pannakataginayon ken pannakaparangpaya ti lengguahe nga Iluko ken iti pannakapasantak ti kultura ken Literatura Ilokana dua a tawen sakbay a naipaulog ti DepEd Order No. 74 series of 2009 a nangwaswas iti 35 ti tawenna a bilingual policy a nangituyang nga Ingles ken Filipino laeng ti maaramat iti sistema ti edukasion.
Impalagipmi a dua a tawenen ti napalabas idi impaulog ni sigud a Direktor ti Rehion, ni Dr. Jesus Lazo Taberdo, ti DepEd Regional Memorandum No. 116 series of 2007 a nangibilin iti pannakaaramat ti Bannawag kadagiti amin a pagadalan iti Tanap a naisaad kadagiti lugar nga Iluko ti kangrunaan a pagsasaona a kas kangrunaan a reperensia iti pannakaisuro ti Social Studies, pannakaparang-ay ti panagayat iti panagbasabasa dagiti ubbing iti elementaria ken iti sekundaria ken uray pay dagiti agtutubo a saan nga agbasbasa wenno adda iti ruar ti pagadalan.
Dinakamat pay ti bilin ti akem ti Bannawag iti pannakataginayon ti Literatura Ilokana, kadagiti nangangayed ken artistiko a kababalin ken kultural a tawid ni Ilokano. Ket babaen ti panagbasbasa iti daytoy a magasin, mamati ti Departamento a mangted iti di mabilang nga impormasion a mainaig iti sosial, ekonomia ken kultural a panagbiag dagiti Ilokano.
Inar-aramat ngaruden ti Tanap ti Iluko kadagiti pagadalan sakbay pay ti pannakaipakat dagiti agur-uray a linteg ti mother language education a pakaibilangan ti DepEd Order No. 76. Iti pannakaipaulog daytoy a paglintegan, ad-adda manen a mapabileg dagiti gannuat a panangaramat iti Iluko kadagiti pagadalan.
Adun a panagsukisok ti mangipaneknek nga ad-adda nga epektibo ti panagsursuro dagiti ubbing kadagiti umuna a tawen ti panagbasada no agaramatda iti nakayanakanda a pagsasao. Babaen ti panagaramat iti nariingan a pagsasao a maawatan ti ubing, saanna laeng a maipateg ti bukodna a bagi ngem maipategna pay ti bukodna a kultural a tawid. Dagdagus a maawatanna ti leksionna no iti bukodna a pagsasao ti maaramat ket dagitoy ti mangtulong kenkuana tapno nalaklaka ti pannakasursurona kadagiti dadduma pay a pagsasao a kas iti Filipino ken Ingles.
Iti panangaramat iti kayo a simbolo ti panagrambak ti Bannawag, nailawlawag met ti akem ti maysa a kayo a kas maysa a natibker a saksi iti inaldaw-aldaw a panagbiag ni Ilokano. Saan laeng nga iladladawan ti Bannawag dagiti kinapudno iti kulturana, pinarang-ay ken sinibsibogan pay ti magasin dagiti natikagan a paset ti kultura ni Ilokano tapno sumantak ken masaksianto pay dagiti sumarsaruno a kaputotan.
Maysa kadagiti impakpakaasimi ti pannakataripato koma ti naimula a kayo ta saan laeng a tawid dagiti Ilokano daytoy. Pakalaglagipan pay iti natalingenngen a panaglalangen dagiti Ilokano, Ibanag, Itawes, Gaddang, Yogad, Igorot ken dadduma a puli a kankanayon a maigunamgunam kadagiti ubbing iti pagadalan. –O
(Naipablaak iti Bannawag, Nobiembre 9, 2009 a bilang.)
Comments
Post a Comment