NAALAKAN, ASSENG: Excuse Me, Miss

Kasla kastoy ti langana daytoy Negro a bidatayo.


KAAY-AYOK daytoy nga estoriaen. Saan a gapu ta estoria daytoy ti kinaubingak a ni Kojak— kaykayatko ngem iti Kudyak nga inus-usarna ta ti inusarko, adda datingna a porendier (foreigner)— no di ket kadagupan kadagiti jokes a nangnangngegko, kasla nakaor-orig daytoy.

Kastoy:

Mapan a dua a tawenen nga agbasbasa ni Kojak idiay Baguio idi napan idiay Zambales, nalabit gapu iti babai (ania pay ngarud ti sabali?) ta nalipatak metten nga inunton gapu itoy nga estoriana. Diakon ibaga no ania a bario wenno ili ta di ket pamkuatan ti maysa a riri daytoy da Kojak ken ti baketna, wenno mabalin nga agkamaliak pay ket ibagadanto la ketdi nga agim-imbentoak.

Tapno umaddang daytoy estoriatayo, naglugan ni Kojak iti dyip a mapan iti ili a rantana. Kalpasan ti sumagmamano a gundaway, adda dua a babbai a naglugan. Nagtugawda iti sangona. Idi aginnestoria dagitoy ket mangngeg ni Kojak nga Ilokanada, isu ti nakadlawanna a napupudawda nga Ilokana— ‘diay atiddog kano ti buokna, kaing-ingas ni Kristine Hermosa (kasiksikatan ti “Pangako Sa ‘Yo” idi estoriaenna daytoy), idinto a ‘diay maysa, agarup Judy Ann Santos a nakutkuttong laeng. Ala, di kad’ adayo nga aglanglangada nga Ilokana?

Puritak ti Kastila, kinunkuna kano lattan ni Kojak ta talaga nga adayo nga Ilokanada a natadul ti tulang iti pingpingna a pangatiddogen ti rupana a napattokan iti sangkapirit koma nga agong.

Ngem, dio, natagarida a kasla dagitay kalugaran laeng iti aw-away laeng no agsaritada.

Bayat ti panagsasaoda, iti maysa a probinsia iti Tanap kano dagitoy nga adda met rantaenda iti maysa nga ili ti Zambales.

“Apay naalana kadin ta dim’ maiturturogen?” kinuna kano ni kaing-ingas ni Judy Ann. “Wenno napugsitannakan ket ikamatmon?”

“Gasia, sa’mm et, a,” insungbat met ni ala Kristine. “Durabenka, ne. Isu a mapanak,” kinunana kano a makais-isemen, “ta siak ti mangala iti dayawna.”

Ay, ta pimgaakda a dua.

“Awan lat’ kabsatna, aya?” kina ni Judy Ann a langana ti umapal.

“Wanenonli,” tinarastas ni Kristine.

Pasaray met agulimekda kano saan a gapu ta sangkakita ida dagiti kalugananda no di ket pasaray agsan-ek ti dyip.

“Puera angaw,” kinuna kano ni Judy Ann, “awan pay nagudilanna?”

“Awan ngarud,” kinuna ni Kristine. “Siak ti makaadu.”

“Dakkel?”

“Slight,” kinunana kano sa kinagatna iti apagdanon ti ngudo ti kikitna.

Ay, kakaasi kan’ a nagteppel ni Kojak ta amangan no madlawda nga Ilokano met.

Nagsardeng da Judy Ann ken Kristine idi naglugan ti maysa a lalaki a panayagen a nangisit— aglanglanga a Negro, kunak man laengen tapno napatak iti imahinasionmo ti langana. Mabalin a puritak dagiti soldado a Kano.

Nagtugaw ni Negro iti abay ni Kojak.

Nasiputan ni Kojak ti panagkinnidday da Judy Ann ken Kristine.

“Dayta, a, ti dakkel butona,” kinuna kano ni Kristine.

“Awan duadua,” kinuna kano met ni Judy Ann.

“No dayta la ti nobiok, a, ket permi a kammel ti pamay-ak,” kinuna ni Kristine.

“Ipaturayko ti agkamkamatis,” kinuna met ni Judy Ann.

Ken adu pay a triple x a patangan para ken ni Negro.

Kakaasi kano ni Kojak a mangilinglinged iti isemna, ken iti bumangon metten a masanguananna. Kimmita lattan iti ruar ket inyaleng-alengna ti mangmangngegna ken marikriknana kadagiti malabsanda.

Idi agangay, nagsig-am ni Negro.

“Para,” kinunana.

Ne, Tagalog met, nakuna kano ni Kojak iti unegna.

“Excuse me, Miss,” kinunana manen ni Negro. “Bumaba man ‘toy dakkel butona.”

Ay, ket kimmamkamatis kano ti rupa da Judy Ann ken Kristine.—O

Agosto 7, 2010