IMBIIT : Agkimkimat

Agkimkimat

AGAR-ARBIS— daytay kalpasan ti napigsa a bayakabak ket nayan-anusna pay laeng nga intartarakitik. Agkambor ti banapbap dagiti bus, bosina dagiti dyip ken anabaab dagiti tumutoy a tao. Pasado alas-otson ngem naintar dagiti nakapayong ken makutkutoran a tattao iti bangketa nga aguray iti paglugananda.

Pangwatiwaten ti pinagnak manipud iti sumsumrekak nga opisina ti pagiwarnak agingga iti sango ti Manila City Hall a pagsadaan iti lugan ket mariknakon a maslepen ti alipusposko ken ti back-pack-ko a pasaray aprosak ta amkek a mabbasa dagiti nagyan daytoy a sumagmamano a papeles a kasapulan iti umadani a panagkasarmi iti simbaan ken baket kalpasan ti pito a tawen a panagdennami. Napasanamtekak la ket ngarud ta saan koma pay laeng a kastoy ti pannakabasak no saan a nagumokan dagiti street dweller dagiti covered walk iti ruar ti Intramuros.

Immapiringak iti bangketa a malinongan ti sanga ti kayo iti igid ti kalsada ken iti abay ti nagpayong nga asmang ti dua nga estudiante— babai ken lalaki siempre ket ti lalaki, siempre manen, ti nagiggem iti payong. Kinusilapannak ti lalaki a bulonna a nangawid iti payong nga imbatog iti ulo ti babai. Kinusilapannak. Sa binisongna ti bibig ti babai. Sa tinaliawnak a kinusilapan manen. Sa inawidna ti babai ket nagpasurongda iti bangketa.

Litsim! nakunak. Siak kamman ti amam ta pinagaradokan, lokdit!

Pagam-ammuan ta naikuduag ti kanawan nga abagak. Kinusilapak ti lalaki. Ngem pinalabeskon idi madlawko nga agrasrasaw.

“Putanginamo pala, eh! Kanina pa ako sa ilalim ng LRT! Tiniis ko ngang baho du’n! Nagpa-kwan ka pa, eh!”

Naulimek ti babai a nangsaruno kenkuana a nakapayong ken nakasakbat iti panakkelen a shoulder bag. Tumanalangkiaw ket dina la ketdi main-intonaran ti panagbusi ti ngiwat ti lalaki a nakasiorpant iti innem ti bulsana ken nakakamiseta iti medio kumebkeb. Nakakallugong iti umarngi iti militar. Ken adda petpetna a knuckle.

Litsim! nakunak. Bimmabayan ta kaapaam, agarmarka, lokdit!

Nagpasurongak iti bangketa. Linabsak dagiti tattao agraman ti asmang ti dua nga estudiante. Tinaliawko met a kinusilapan ti lalaki nga estudiante. Tiplakekto pay no kumarit.

Napno dagiti bus a biahe a mapan Fairview, nga isu koma ti pagluganak. Kalawkalaw dagiti biahe a mapan Cavite.

Pagam-ammuan ta naikuduag manen ti abagak. Ti manen lalaki a nakakallugong iti kas iti militar. Rasawak koman ngem napartak itan, arintarayen ken iggemna ti ima ti nakapayong a babai.

“Dalian mo!”

Sangkataliawda ti naggapuanda. Timmaliawak met. Awan met ti makitak a mabalin nga itartarayanda.

Nagpasurongda. Bumallasiwda a saan. Napartak ngamin ti trapiko.

Pagam-ammuan, limmabas iti abayko ti lalaki a nakapantalon iti maong ken nakakamiseta iti puraw. Ken bitbit daytoy ti sandaliasna. Nalabit tapno nakapkapet dagiti sakana iti kalsada a pinagalisen ti naglalaok a tudo, tapok ken langis.

“Putangina n’yo! Magkakalintikan na, puta!” kinunana a nangsurot iti dua a nagpukawen iti surong a paggapuan dagiti napuskol a lugan.

Nagtitinnaliawkami ken dagiti padak nga agur-uray iti lugan. Nagsardeng ti dyip iti sangok.

“Putangina!” Nagpaggaak ti drayber. “Kawawa naman!”

Nagtengngaagak. Awan latta ti bus a nagkaratula iti Fairview. Naggampor dagiti bosina. Nagsasanggala dagiti silaw. Iti adayo a law-ang iti batog ti Manila Bay, nagsasaruno a nayuged dagiti babassit ngem nalalawag a kimat. (asseng. nobiembre 4, 2011)