9 a Daniw ni Sam-it ken 1 a Samiweng ni Pait

ITI KAAWANMO, KASTOY A BUKODAK TI SAEM
(para iti sabong a diak pulos natapaya ti panagsampagana)

bilbilangek dagiti nagkukurus a naibatek iti ules
bayat nga awanan-gaway, di malisian
ti panagtedted ti linnaaw iti muging
ket mabibineg ti amin nga urat ti kinasimbeng,
sukitsukitenna ti agruprupsa a ngipen iti gugot

ti di panagkir-in no sumilud dagiti lamok
agingga kadagiti maudi a rimat ti alintatao
ken no kuminnit dagiti kiteb kadagiti sulsulinek
ti pennet ti piskel, kadagiti murdong ti siding

kas iti mangkudkod iti igid ti agpakpakillo a sugat
a naynay a pakatarimbangonan iti parbangon
ket giddato nga ukraden ti ladawan
sa paspasurotan dagiti nalilidem nga uged
a nangabbong kadagiti namamaris a lagip

in-inayadek nga aprosan ti pungan, ti ules, ti ikamen—
tunggal karenkenda a nalabit simmuksokan ti ayamuommo
a nasiputak a limmabas iti tagainepko nupay nakaparpartak
a kas iti layap, amang ngem iti pettat a pannakatiag
wenno iti panagtalapuagaw ti sipnget apaman a nangirasak

kas iti sigarilio a menthol nga in-inayad a susopek
tapno mananamko a nasayaat ti gidiat ti lamiis
ken ingel. kas iti kape nga in-inayadek nga igupen,
nga uray no napudot, diak pagbanerberen— naulimek
a mangnanam iti nagsusupadian ti sam-it, pait
ken makadilnak a pudot nga uray la agluptak ti dila.

nainayad a panagngalngal iti papait ken ubog ti uway
sa mapabulonan iti tubbog ti paria, wenno red horse
a nabayag a naipasirok iti lamisaan a nakataptapok

ti panaglibut ti dakulap kadagiti nalalamiis a tugaw,
kuadro, sarming, libro, killabban, tapok, adigi
a nagkulmegan ti alutiit a nangalimon iti saltekna

ti panangipatpatedted kadagiti lua iti puon
ti masetas a nalayet iti naunday a panagsegsegga...


may 15, 2011


Mangliwengliweng nga Ulimek

Ti karkaradapen dagitoy dakulap,
Kas iti maulit-ulit a panangpirpirit
Iti Santo Rosario tapno mapatgan
Ti kiddaw a milagro

Iti naunday a pasilio daytoy a kinaulimek
Agparparintumengak nga agliblibut
Ket mangnamnama nga iti ungtona
Adda ti lawag, wenno anaraar
Wenno uray aparision laeng
Ti nakapurpuraw a sampaga—
Imakulada nga idi pay, napartuaten
Ken awanan kanibusanan

Ngem nawatiwat unay daytoy a kinaulimek
A kasla ketdin naikursongak iti awanan-ungto
A nagtimbukel a panagsagaba— agliklikawak laeng
A mangun-unor iti isu met laeng a panagtutuok
A mangur-uray iti ilulutuadmo
Ta uray koman naipaskilda iti kasipngetan
Dagiti pagilasinan, ikagumaak a siraraten
Ti kaipapananda a namnama—
Uray iturturongen daytoy gumawgawawa
A kinadaksanggasat

Ket daytoy maulit-ulit a libut
Kas iti maulit-ulit a panangpatedted
Iti tubbog ti paria itoy nagtagisabong a dila
Panangiradradrad iti asin
Itoy agpakpakillo a sugat iti batog ti barukong
Panangiridridis iti isip
Ti amin a kinamaag daytoy lubong
Panangibatbattuon iti puso
Ti amin a basol daytoy Daga

Daytoy a kasipngetan ti panes
Ti panagpauyo ti saltek ta ti kinaulimekna
Ti nabatbati a mabalinna nga ikannawag
Ti panagkidem dagiti bituen
Iti ilulutuad ti layap ta adda ti kinarimatda
Iti sabali nga uniberso a di agkasapulan iti lawag

Ket addaak ditoy
Mangan-anus a dagitoy lulua
Makagtengda iti ridaw ti kaunggan ti bato
A nalabit naglemmengam, Datdatlag

Mayo 6, 2011



Kigaw

Kas iti itatallikud ti Abril
Ti kinaatap dagita matam
Ingkuadrok dagiti alintataona
Ket kaslaak agbagtit a mannaniw
A nangiturturong a dagiti naglalaok
A puraw ken nangisit a ladawan
Siak dayta— siak ket awanen sabali
Ket aglusdoyak ta sabali la gayam
A panaginnagaw ti sipnget ken lawag.

Maburburtianak iti kinaulimek daytoy nga Abril
A nangidateng kadagiti naanem-em a linnaaw,
Kadagiti layap iti nakalawlawa nga ariwanas
Kadagiti nauumbi a pul-oy iti aldaw a makumikom
Ti Init iti panangsuotna kadagiti amin a kinalangto.

Maburburtianak ta nalabit daytoy nga Abril
Pinengdanna nga agtugmok dagiti imatangta
A no nagtugawka koma iti sampaga
Mangibaon iti alimbubuyog a mangsilud kenka
A no nagluganka iti abagat
Ibaonna ti makayepyep a bara
Ket mairidepak bayat ti naannad
A panangilabasna kenka iti sanguanak.

Pimmanawen a kasla tapok, kunkunak laengen,
Ingkay-aben ti nakersang a pul-oy
Wenno natnagen a kasla nagango a bulong
Ket aglemlemmengen
Iti sirok met laeng dagiti padana a bulong

Wenno kas itay samiweng
A bayat ti pannakailibayko
Naipatangatang ket naggibusen
Sakbay pay a makatagtagainepak iti namaris
Nga isasangbay ti sabali manen
A nadungngo nga Abril.

Ita, sumsumga ken agparparintumengak
Iti sakaanan daytoy umuna a parbangon
Ta barbareng intalek met laeng ti Abril
Ti sampagam itoy a Mayo.

Mayo 1, 2011



Ti Lagip Kasla Papait
(maysa a samiweng)

Ti lagip kasla papait
Ilagidna iti isip amin a pait
Ti lagip kasla papait
Ilagidna iti isip amin a pait

Ta sika, Biagko, adda’t adayo
Nga adda koma iti sibayko
Ket no malagipko ‘ta isemmo
Ar-rakupek ‘toy kinapimanko

Ti lagip kasla papait
Ilagidna iti isip amin a pait
Ti lagip kasla papait
Ilagidna iti isip amin a pait

Ngem patgek amin a lagip ‘ta isem
Kas papait, tagisam-itek nga alunosen
Uray ar-arakupek kinapimanko
Tunggal malagipko ‘ta isemmo


Abril 30, 2011


Ti Panangidaniw iti Ayat

Sampaga,
Saan daytoy a sabali a sabong ti dila
Wenno limtuad iti salamangka iti karnabal
Saan a palabras iti angin
Wenno iti asino man a mutia iti entablado
Saan a mensahe daytoy ti pannagibi
A maisurat iti danum
Wenno iti tapok
Tapno laeng pugasen ti alipugpog
Wenno bayakabak
Saan nga aleng-aleng a kari ti wak
Wenno forwarded a text
A binalabala ti asino man nga empleado
Ti telecom uray man no iti pannakasuratna
Madama daytoy nga agay-ayat.

Agang-angawka kadi no ibagam
Nga ang-angaw
Ti mangsiblok iti mutia ti sabunganay
Ti mangtiliw iti layap
Ti mangbirok iti itlog ti kannaway
Ti mangtakuat iti sangamalabi a balitok
Iti ungto ti bullalayaw?

Naangawak, pudno.
Ngem dagiti balikasko kenka
Naitagbat iti bato.

Napudno kas iti katulagan
A naikitikit iti duogan nga algarruba
Naanus kas iti riniwriw a linnaaw
A mangtiktiktik iti nabiag,
Bimmantay a bato.

Nalabit angaw
Ti mangyanag iti panagayat
Kadagiti pangngarig
A dinto pulos pumudno
Ngem wagas dagita, Sampaga,
A mangiladawan
Itoy aglaplapusanan,
Napudno, di agang-angaw
Nga ayat.

Abril 27, 2011



Daniw a di sinangbayan ti paulo

Sabali manen daytoy a parbangon
A di pannakaidna
Ta uray dagiti kanito
A dangdanganek ti ulimek
Ken panagsegsegga iti panagtinnag
Ti mutia ti sabunganay
Matikawak iti tunggal pallayog
Dagiti bulong
Iti panagtinnag dagiti linnaaw
Ket diak maliklikan
Nga anagen dagitoy
Ta nalabit
Adda sadiay ti pagilasinan
Ti isasangbaymo

Ngem awanka

Nasiertok payen
Ti kinapartak a mangsiglot
Iti puraw a panio
Tunggal agparang
Ti layap
Wenno uray ti gayadan ti kamiseta
Ngem rinibun
Dagiti lawag a tinapayak
Ken kinasarsaritak
Dagiti rimatda
Agtalinaedda a gagangay nga anaraar
A tagikukua ti sumangbay a bannawag

Ta sika, nagtalinaed nga awan

A nalabit paset latta ti ariwanas
Ngem adda iti bangir
Daytoy Daga
A pagtaktakderak
Nga uray agridamak
Iti naunday a panagrikusna
Dinto latta magam-udan
Ti kidmatna
Ta naynay met nga agrikrikus
Tapno laeng matallikudannak

Ket agnanayonka nga awan

No kadi makipagbettak
Daytoy tapok
A nangkalupkop kaniak
Ket maysaak metten
A lawag kadagiti natalinaay
A parbangon

Agparangka?

Abril 26, 2011


Manipud iti C., Tinapayaka, Ayat
(pamakpakawanan ni e.e. cummings)

manipud iti c., tinapayaka, ayat,
ditoy dakulap (inwagsakko nga immuna
dagiti tapok ken darat a naimilatmilat)
ket siaannad— kas iti panangay-ayam
ti pul-oy iti bulong salaysay—
intaengka ditoy kaunggan. ti bulan,
dagiti bituen ti saksi iti rabii
nga uray isuda ket naklaat
a kas kaniak iti pettat
a panagparangmo iti sanguanak

kas iti kauneg ti taaw daytoy a kaunggan
ngem dika italimeng a kasla palimed
ketdi naynay nga itag-ayka iti sinamar
nga ipaspasag iti aplaya, o ayat,
ket no siakto man ti agtagipayak
idingpilka iti pingping ti langit
italekka kadagiti panagibi ti ulep
ta tagipatgek ti panagbisbisibisda
kaniak tunggal adda igaaw
iti barukong a pagsantakam

manipud iti c., tinapayaka, ayat


april 22, 2011



Nadungngo ti Abril
(pamakpakawanan ni T.S. Eliot)

Agkarayam ti dakulap ti Abril
A mangsapul iti naregreg a linnaaw
Iti katapokan. Matda a mangpirpirit
Kadagiti nginabras ti kalgaw
Ket nakapimpiman a mangrambak
Iti lailo ti taptapuyo.

Ta nakersang dagiti dakulap,
Sumsumgiab a kas iti abagat
A mangsapsapul iti panagindayon
Dagiti kinelleng; mangbirbirok
Iti panangidingdingpil ti karayan
Iti bibigna kadagiti
masmasnaayan a tangkig
maburburiboran a kadaratan

Nakersang kas kadagiti naidasay
A garami ken nagmagan a tugot
Iti sigud a kapitakan a taeng
Itan ti naruros, naitayab
A sabong ti bagbag

Sapsapulen daytoy nga Abril
Ti witiwit, ti bukot ti nuang
Ta adda kadagitoy ti lamuyot
A di makarikna iti kinakersang
Ketdi ti apaganem-em nga apros

Masansan a masnaayan
Iti pettat a yaay ti kalgaw
Ket kasla kigaw dagiti nalalamiis
A sardam ken kannag
A nagtalapuagaw iti din maanninawan
A kasipngetan.

Ket pettat met a maipusing
Dagiti nalamiis a lulua,
Ti nalamiis a rikna
Iti gumaygayebgeb a darang
Ni Apo Init.

Ngem kas iti kinaannad ti panagdisso
Ti sabong ti bagbag
Siiinayad ti nakersang a dakulap
A mangallin kadagiti nalamiis a lua,
A mangyapros iti apaganem-em
A bara ti Daga iti nalamiis
A rikna.


AST
041311


Ur-urayenka Uray Agingga iti Panagsabong ti Kawayan
(pamakpakawanan ni Apo Cles Rambaud)


Ur-urayenka uray agingga iti panagsabong ti kawayan
Ta awanka iti sampaga ti kamia, wenno iti ayamuom ti rosas

No addaka’t dayyeng ti saleng, iti damortis siak ti agparintumeng
A payapayanna dagiti napino nga angin a pangabelak iti samiweng

Ur-urayenka kas iti panagarapaap dagiti rengngat iti littugaw
Tapno mawayaan dagiti rettab nga agkan ti sinamar, ti linnaaw

Ngem ti pagilasinan ti yaaymo, kas karasay ti ulep iti Mayo
Nakalawlawa nga asul ti tangatang, kas kawatiwat panagurayko

Malayetak a mangur-uray iti di panagkeppet ti bulong ti baimbain
A birtud koma’t lana a pagsapsapo iti panaguray kenka ket di malammin

Agsapsapulak kadi’t babato ti alipugpog wenno iti itlog ti kannaway?
Ay, maregreg ti namnamak, Biagko, kas panagtinnag bulong salaysay

Inim-imdenganka iti awag ti saltek, iti sinnungbat dagiti riari ken kuriat
Ngem iti naunday nga ulimek, iti bumitog a bitek ti puso, nagsagabaak

Tapno makitaka iti sardam, inay-ayok ti bulan iti innapuy a nakapudpudaw
Ngem ti sangkaballing a namnamak, kas iti layap, pettat a bimtak, nagpukaw

Ti mangsapul kenka, kaslaak ubing a mangsensenial iti bituenko
Agur-uray nga agpasag iti saklulo ket appupuek ditoy puraw a panio

Ay, agpakpakaasiak iti ayat ti kannag ta pasikalenna ti bannawag
Ta ti nawatiwat a darikmat a panagur-uray, kumkumsen met daytoy biag

Idawdawatko pay ketdin, O Ayat, a sika koman ti anaraar ti baggak
A mangapros itoy nakalamlamiis a rupa a linasat dagiti lua a nanakanak

Ngem urayenka latta uray sika met laeng ti tagiuray a sabong ti kawayan
Uray no kaipapanan ti inka ilulutuad, isu metten ti innak pannakarsaak


Abril 4, 2011



Tunggal Tangadek ti Ariwanas

Tunggal tangadek ti ariwanas
Makitkitak ti panagmaymaysam
Iti kasipngetan
Awanan saripda ti kuppokuppom
Iti kannag
Iti ania man nga ibuyat ti tangatang

No addaka koma ditoy a disso
A dagiti dapan, mariknada ti anges
Ti daga; dagiti dakulap, appupuenda
Ti salemsem dagiti linnaaw,
Ipalagipko a kabaelan nga idul-o
Dagiti sabidong iti bagi
Kas iti panangidul-o ti maladaga
Kadagiti pungtot ken sanaang
A nakunnotna iti barukong
Ti natirtiris nga ina
Uray no ita, masapul nga arub-obem
Ti nagpespesan ti amin a napait iti lubong.

Sagpaminsan, supringem ti boksitmo,
. supringem ida a di mangikaskaso
. iti kayatmo

Sagpaminsan, bay-am nga ibagnosnaka
. dagiti bituen

Ta ditoy sangkatulnek
A batog dagiti nagririmmuok a rimat
Adda disso a nawayaka nga umanges,
. nga umaddang,
. a makikinnibin...

AST
030811