panagpatubo iti pasengseng

nasaem ti agpatubo iti pasengseng
nalabit gapu ta lumtuad iti suli ti kanigid a gugot
iti puon ti urat a kumamang iti puso
bettakenna ti lasag iti panga, ken agluptak
ti agarup amin nga uneg ti ngiwat— narigat
ti agngalngal; agramaram ti sakit iti tengnged,
teltel, iti sibubukel a rupa agingga iti tagainep.

iti panagtubo ti pasengseng, malagipmo
dagiti naglabas a nasasaem a kanito:
ti pannakadilnak ti dilam iti kape a kinirog a bagas,
ti pannakagasangmo iti silit’ sairo, ti damo
a pannakapaay ken ni ayat, ti pannakatagibassit
iti sango ti klase, wenno iti sango ti katalonan
a mangiparparupa a makitaltalonka laeng ket isuna
ti akinkukua iti talon, ti pannadunggiar ti tumeng
gapu iti pannakatulid ti damo nga isasakaymo iti bisikleta
wenno ti pannakasagud ti abagam iti panagwang-it
ti di pay nakapon a bumaro a nuang,
ti pannakakugitmo wenno ti kantiaw dagiti kapatadam
a limnek ti mabagbagim gapu ta mabutengka
iti labaha, ti pannakaareglo dagiti nangtagbat
iti maysa a mannalon, ti pannakaipasagad iti kalsada
ti bangkay ti kaarrubam a nasingpet a baro a maatap
a nagpabantay a putot ti natagtagbat a mannalon…

amin dagitoy, umayda nga agsasaruno a saem
no di man sangsangkamaysa gapu ta pilpilitem
a yaleng-aleng daytoy saem ti pasengseng
kayatmo a tagibassiten ket awan ti karbenganna
a mangadipen kenka wenno mangburibor kenka
ta nalpasamon dagiti daddadakkel pay a saem.

ti adatna ta sulisogen dagitoy napalabas a saem
dagiti agdama ken masakbayan a panagduadua
a mabalin a mangipaay kenka iti daddadakkel manen
a saem, uray pay dagiti awan met pakaibiangam
koma a bambanag ngem siempre, nangnangruna
dagiti direkta a mangipalayto kenka iti saem

ta uray ania ngamin ti aramidem, kasla lumabas laengen
a gagangay nga angin dagiti napalabas a nasasam-it a lagip
a kinapudnona, awanen ti sam-itna, idinto a ti saem
uray iti adayon a napalabas, sukitenna ti pusom
nga inkamang met ngarud ti urat iti agtubtubo ita
a pasengseng…

Oktubre 7, 2011