Ket Nagmodelo Met ni Tatang

Ket wen, nakapagmodelo metten ni tatangko, ni Tatang Artemio Tactac Tabag. Ket iti pay met pagmamahalna piman a Bannawag.

Wen, pagmamahal kunak ta manipud pay idi 1984, awanen ti labasna a gumatang ni tatangko iti Bannawag. Uray no awan makukuartami idi, adda latta Bannawag a gatangen ni nanang ta no awan, ma-outside de kulambo isuna, hehehe. Kas pangarigan, iti naminsan, gimmatang laeng ni nanang iti asukar (awanen ti kape ta mabalin met ti mangpakset iti bagas), bugguong, ken Bannawag. Kasta ti panangipateg ni tatang iti Bannawag.

Nalabit, maysa daytoy kadagiti motibasionko iti panagsuratko, ken nagangayanna, ti panagarapaapko nga agbalin a kameng ti Bannawag. Pudno, ad-adu a porsiento ti para ken ni tatangko ti kaaddak iti tay-ak ti Literatura Ilokana, kas panagyamanko met kenkuana iti panagtubayna kaniak kas maysa a tao.

Siempre, dakkel a yamanko no ibagak a daytoy para ken ni tatang (ti panagsuratsuratko), ket isu met gayam ti kayatko nga aramiden iti daytoy a biag. Daytoy ngarud ti kunada a win-win situation para kadakami ken tatang-- agsursuratak para kenkuana nga isu met ti pagaayatko nga aramiden. Ket sapay koma met ta winner met ti Literatura Ilokana ken ti Bannawag iti daytoy panagsuratsuratko.

Kabayatanna, adtoy man ni Tatang Arting ken ti house-ad ti Bannawag a nagpaayanna a modelo. Naipablaak daytoy iti Oktubre 20, 2008 a bilang ti Bannawag:

Agur-urnongka iti Bannawag?

No, wen, kunam, agparetratoka iti abay dagiti pempenmo a BANNAWAG (a kas iti nailadawan) ket ipatulodmo dayta a retrato iti opisina ti BANNAWAG. Amangan no sika ketdi ti mapagasatan a mangyalat iti maysa kadagiti tallo a gunggona iti pasalip iti kinnaaduan iti urnong a BANNAWAG iti panangesponsor ti GUMIL Oahu, ti gunglo dagiti mannurat nga Ilokano iti Oahu, Hawaii, nga idauluan ni 2005 Leona Florentino Awardee Gladys Menor.

Dagiti pagalagadan?

Uray ania nga isyu, manipud idi 1934 a pannakairuar ti umuna a bilang ti magasin agingga iti kaudian a bilangna, ti mangbukel iti urnongmo. Uray pay nasursurok ngem maysa a kopia ti isyu ti magasin, okey latta, ta no dadduma, saan met a maymaysa a kopia ti gatangem no kua, di ngamin?

Mano met ngatan ti urnongmo? Bilangem man manipud iti umuna agingga iti kaudian. Ania nga isyu dayta immuna? Ania met ti kaudian nga isyu? Ala, isuratmo. Saan a masapul nga isuratmo amin nga isyu; di pay ket napalalon ti bannogmo no kua.

Ala, pempenemon, pumustoraka met bassit ta agparetratokan iti abayna. Mabalinmo met a kagrupo iti retrato dagiti kabbalaymo wenno gagayyem wenno kakaarrubam a naayat met nga agbasa iti BANNAWAG. Kalpasanna, ipatulodmon iti BANNAWAG ti retrato (naka-digital man wenno napadebelop).

No dimo latta ammo ti aramidem, ay, ket agpatulongkan, a, iti asino man a mannurat iti BANNAWAG dita lugaryo—ta saan met a kualipikado dagitoy a makisalip, agraman dagiti aglaklako itoy paboritom a magasin. Kinapudnona, mabalin pay dagitoy ti mangipatulod iti retrato dagiti gagayyemda nga agur-urnong met iti BANNAWAG.

Mano ti premio, kunam? Ala, ket addanto igatangmo iti ad-adu pay a BANNAWAG, a.

Umuna, P3,000.00; Maika-2, P2,000.00; ken Maika-3, P1,000.00.

Hm, amangan no nayonanto pay dagiti kameng ti GUMIL Oahu dagiti premio wenno bilang dagiti mangabak, madika pay? Apay, kapuy?

Ala, agkutikutika ngaruden, ta paset daytoy ti panangrambak ti BANNAWAG iti maika-74 nga anibersariona!

Ipatulod ti ladawan, sa iti maysa a papel, isuratmo dagitoy: naganmo a makisalip, kompleto nga adresmo, pagsapulan wenno panggedan, numero ti selpon a mabalin a pangkontakan kenka no mangabakka, no mano a kopia ti urnongmo a Bannawag, ti umuna a bilang ken kaudian a bilang ti urnongmo, ken no adda kakaduam iti retrato, inaganam met ida, a.

Ipatulodmo amin dagitoy iti: BANNAWAG, Manila Bulletin Publishing Corp., Muralla cor. Recoletos Sts., Intramuros, 1002 Manila. Wenno iti e-mail: bannawag.mb@gmail.com (no naka-jpeg format wenno naka-msword ti ipatulodmo).

Nasken a maawat ti BANNAWAG ti pakisalipmo iti di naladladaw ngem iti Oktubre 22, 2008.

Kasano a maammuak a nangabakak, kunam?

Maipablaakto iti BANNAWAG ti ladawan dagiti nangabak (ken uray pay ti ladawan dagiti sumarsaruno a kaaduan iti urnong) iti Nobiembre 3, 2008 a maika-74 nga Anibersario a Bilang ti magasin.

Kasano met a maalam ti premiom?

Addanto mannurat iti BANNAWAG a personal a mangyawat kenka iti premiom, interbiuennakanto pay tapno maipablaak iti BANNAWAG ti pakasaritaan ti biagmo (ti pakainaigan ti BANNAWAG iti biagmo, kunatay koma).

Ay, wen, gayam, saan a kualipikado a makisalip daytoy nailadawan. Isu ni Artemio “Arting” T. Tabag, mannalon a taga-Villa, Sta. Teresita, Cagayan. Nupay inkakaubingan ni Manong Arting ti nagbasbasa iti BANNAWAG, nangrugi laeng a nagurnong idi 1984. Lima pay lat’ tawen idi ti putotna nga agnagan iti Ariel. Daytoy met nga Ariel, kunana a dagiti met BANNAWAG nga urnong ni tatangna ti nagsursuruanna a nagbasa ken namagbalin kenkuana a managayat nga agbasabasa iti uray ania, libro man wenno magasin. Nagturpos ni Ariel a Cum Laude iti AB Philosophy iti Our Lady of the Angels Franciscan Seminary, Q.C., ket isu ita ti Poetry ken Entertainment Editor ti BANNAWAG.

--Editor