Adda iti Daga Dagiti Dapanna

Awan ti pagpatinggaan dagiti matana:
Masaksianna nga agkikinnallabay dagiti turod
Ken kabambantayan a mangrukod
Iti kaunggan ti taaw agingga a magtengda
Ti eternidad ti ayat a di mamagdadasig,
Di mangilanglangi, ketdi mamagpapada.

Ngem bassit-usit ti bilegna a mayasping
Iti init a mangbilang iti danum ken kadaratan
Babaen ti darangna. Idinto a ti gayebgeb
Ti isip nga aglaplapusanan, mangdidigra
Kadagiti partuat a di agnanayon, temporario—
Pangar-artiok iti lasag a napnuan derrep.

Nagtubo ti sara iti mugingna, kas iti toro,
Kamkamatenna ti naatap nga arapaap
Idinto nga agliklikaw iti nailet a lubongna.

Naisangsangayan iti agdaldaliasat
Ti idadanonna nupay di mangnamnama
Ta agtalinaedto latta a ganggannaet:
. iti barukongna nga aglati dagiti pasdek
. ket kayatna a lemmesen iti sangataaw a lua
. ta kadagiti abagana, agdungdung-aw ti away…

Nagpayak man iti ulep ti kararuana
Adda iti daga dagiti dapanna: kalikagumanna
Ti panaglangto ti aglawlaw tapno agsubli
Dagiti tumatayab a mangikanta iti panagrusing;
Agtalinaed a pattapatta ti paraiso a namunganay
Iti panunot— idinto a ditoy, taptapayaenna.

Dagiti rettab ken uong, iladawanda ti agnanayon
A panagkikibin ti daga, sabsabong, tao, ken tapok.

Ket ti pinadis, saanen a nakasaluket iti taleb
Saanen a sapoten ti arado ken paginuduan
Aginat ti pusa— makilnawan, mausaren ti alsong
A nakapalabsan iti atiddog a panagam-ammusay.