Pammagbaga

(ken ni tatang arting iti maika-55 a panagkasangayna idi enero 25)

Inestoriana no kasano a sinamalna dagiti siba
A pettat a nangdarup iti pinagayan kalpasan ti layus
Sa iballaagna a tikag ti mangsaruno iti ulo-ulo ti danum.

Kas iti dati, nagmasngaadak a dimngeg
Ta insab-itko ti utekko iti kangatuan a pasdek
Iti siudad— pinugsatko dagiti waya ti ariangga.

Pagin-inanaanna latta ti mangkitikit iti ulo ti kabalio,
Wenno daydi agila iti Bantay Quimmallugong
Iti bukodna a tignay ti dakulap ken mutektekna.

Nasaludsodko ti ipupuskol ti rupa dagiti politiko
Insungbatna nga awanen ti makitana a rupa
Ket ad-adda a makasarsaritana dagiti bambantina.

Nakitak dagiti aglatlati nga eskuelaan ken ospital
Ti agrakrakaya a simbaan ken sumagmamano a kapilia
Ket ti bandera ti pagilian, adda iti tengnga ti poste.

Adda iti kompiuter dagiti impormasion ti lubong
Ket agpadan ti uniporme dagiti maestra ken serbidora
Naimassayag ti putot ti alkalde nga agnagan iti Doggie.

Kinunana dagitoy a kas man dagiti ling-etna ti insukatna;
Uray agpartuat iti balikas ti kangrunaan a panggedak
Palamutennak latta iti tapok no agkinnamatankam’ koma.

Pinekpekkelannak ket nariknak ti apagsingising nga init
Sa pinerrengnak: Balong, maysakan a ganggannaet,
Ta dagiti nakitam, di pulos maimatangan dagiti agnaed.

Ket nangatangkami iti pagassawaan a karurayan,
Pinadis, arak, inkiwar: iti sumipnget, inyud-odangandak
Ta nabati kano la ketdi iti siudad ti kararuak.