DI PAY NALUTO NAIBUSEN

Impakadak ken ni Apo Angelo ‘Eloy’ Padua ket nayat nga ipaskilko ditoy ti linawas a kolumna iti Bannawag. No apay a kayatko, gapu ta ipromotna kano dagiti talent iti Amianan, siempre, kangrunaan dagiti Ilokano. Wen gayam, ni Apo Eloy ti putot daydi Apo Art “Malutluto Maib-ibus” Padua. Isu a kasta ti paulo ti kolumna. Kasla idolona la unay daydi tatangna. Tinawidna pay ti kina-presidente ti Famas :-)

Asino ti Sumaruno kada Maria ken Charice?

NANANAM nga orasyo, Kakailian. Sapay koma ta mayat latta ti saadna.

Sakbay ti amin, kablaawanmi man amin a kameng dagiti pamilia Aragon iti Amianan.

Wen, a, ta bayat ti pannakasursurat daytoy, buybuyaenmi met ti panagkanta ni Maria Lourdes Aragon iti programa ni Ellen Degeneres— babaen ti Youtube.

Ayna, ta naglaing man nga ubing daytoy. Kasla putotmi met lattan a ta 10 aniosna laeng.

Wen, adda atapmi nga adda darana nga Ilokana. Nasimgat a kayumanggi ni Maria Lourdes.
Isu a masagid ta masagid met ti riknami.

* * *

Kaano laeng a naipadamag nga in-Tweet ni Lady Gaga ni Maria Lourdes kalpasan ti pannakaipaskil iti Youtube ti panangkanta ni Maria Lourdes ti maysa a kanta ni Lady Gaga?

Kunam pay, timmayok a dagus iti milion ti nagbuya itoy nga ubing.

Kasta ti kabileg itan daytoy Youtube nga agpalatak.

Saanen nga agdalan iti telebision wenno recording company.

Kitaenyo laengen ni Charice.

* * *

Isu a kadagiti annaktayo iti Amianan, awan dakesna no padasenyo met ti agipaskil kadagiti performances-yo iti Youtube.

Ditay la ammo no sarunuenyo met da Charice ken Maria Lourdes.

Apay, kapuy?

* * *

Ken malaksid iti Youtube, padasentayo man met nga itandudo dagiti talento dagiti Ilokano babaen daytoy a kolumtayo.

Siempre, ad-adu latta met nga Ilokano ti agbasa iti Bannawag ngem iti
agbuya iti Youtube.

Aya?

* * *

Nadamagmi, Kailian, a mapaspasangasanganen ti panagirekord ni kumakanta Ludy Ely Bravo iti albumna.

Siempre, Ilokano nga album dayta.

Congrats, Ading Ludy.

* * *

Adda dagiti pada a mannurat a nangipadamag kadakami a naimatanganda ti kabaelan ni Ading Ludy iti kinnantaan.

Maysa ngamin isuna kadagiti mannurat-performer a nagpabuya iti “Anasaas iti Karayan” a pinangrambak ti gobierno probinsial ti Cagayan iti Nailian a Bulan ti Arte.

Wen, mannurat iti Bannawag ni Ading Ludy.

Makaabbukay ti timek ni Ading Ludy, kunada man.

* * *

Saan kano met a nagpaudi ni Ralph Recto Calube, ti 11 anios a kumakanta iti Currimao.

Agasem ta adda kano pay maestra a nagpumpunas iti luana iti pannakasagidna iti kanta ni Ralph.

Siempre, Ilokano met laeng ti kinanta ni Ralph a kaaduan kadagitoy ti naipalaon iti albumna.

Wen, addan album ni Ralph.

Ay, ta maysan sa ketdi nga ubing nga Ilokano ti sumaruno iti tugot da Maria Lourdes Aragon ken Charice Pempengco.

Ala, ibideoyo man ni Ralph, Kakailian, sa i-upload-yo iti Youtube.—O

(No adda dagiti am-ammoyo a performer iti barangay wenno iliyo, agpasigkayo ken ni Eloy Padua; i-e-mail-yo kenkuana ti padamagyo agraman ladawan dayta ipagpampannakkelyo a performer iti lugaryo. Iturong iti bannawag.mb@gmail.com.—AST)

NAIPABLAAK ITI BANNAWAG, MARSO 7, 2011 A BILANG. NI RALPH RECTO CALUBE TI NAILADAWAN