Ti Sarsuela Maipanggep iti Dua a Bannuar a Babbai

DI PAY NALUTO, NAIBUSEN
Ni ANGELO 'ELOY' PADUA'
Naipablaak iti Bannawag, Marso 21, 2011





Ti Sarsuela Maipanggep iti Dua a Bannuar a Babbai


MAIPANGGEP iti kinalaing nga agkanta dagiti Ilokano ti imbambandodatayo kadagiti napalabas a bilangtayo, Kabagis,

Ita, ti met laingda iti akting.

Adda padamag ni Kabagis FREDDIE G. LAZARO a taga-Ilocos Sur.

Siempre, no ibagam ti Ilocos Sur ken akting, sarsuela ti damo a sumrek iti panunotmo. Di kadi, Kabagis?

Adtoy man ti surat ni Kabagis Freddie:

“Iti sabali manen a gundaway, naipamatmat manen ti bileg ni ayat para iti panakasaluad ti biag ken tawid.” Daytoy ti kangrunaan a bugas ti sarsuela a napauloan iti “Babae ng Digmaan” nga improdius ti gobierno ti siudad ti Vigan nga idauluan ni Mayor Eva Marie Singson-Medina babaen ti panangurnos ken panangidirihe da mabigbig a mannurat ken kompositor Sonny Cristobal ken Ato Del Rosario.

Dagiti met agkakalaing nga artista iti Sarsuela Ilokana iti probinsia ti Ilocos Sur ti nagakem.

* * *

Babai iti Gubat. Agpaut iti maysa nga oras ken uppat a pulo ket lima a minuto, namsek iti estoria ti sarsuela nga ang “Babae ng Digmaan”.

Iti nasao a sarsuela, naiparang no kasano a naispal iti arinunos ti Maikadua a Gubat ti Sangalubongan dagiti ag-dua gasut nga antigo a balay a nabangon pay laeng idi panawen dagiti Kastila. Naikeddeng ngamin a bombaen ken puoran dagiti soldado nga Amerikano idi WWII. Ngem saan a natuloy gapu iti panangibaga ni Fr. Joseph Klecamf, agdama a kura paroko iti Saint Paul Metropolitan Cathedral, nga awanen dagiti soldado a Hapon nga aglemlemmeng sadiay. Ta ngamin, kalpasan a naideklara a mabomba ti siudad ti Vigan, dagus a napan nakisarita ken ni Father Klecamf dagiti dua a kangatuan nga opisial ti soldado a Hapon a da Major Sakae Narioka ken Major Fujiro Takahashi sakbay a panawanda ti lugar a nagkiddawan dagitoy dua a lider dagiti soldado a Hapon a saanna koma nga itulok a madadael ti siudad gapu iti gubat para kadagiti panawanda a pamiliada nga agnanaed kadagiti antigo a balay.

Wen, agsipud ta nayasawa ni Major Narioka iti maysa a Filipina a ni Belen Catillo; idinto a ni Major Takahashi, nayasawa met ken ni Adela Tolentino, sabali pay a Filipina.

* * *

Ayat ti Nangispal. Iti ababa a pannarita, daydi ayan-ayat ti dua a lider dagiti soldado a Hapon kadagiti dua nga Ilokana ti agparparang a rason no apay a nasalbar dagiti antigo a balay iti Vigan. A dagitoy nga ayat ti nagbalin a tulbek tapno panawan dagiti Hapon ti nasao a lugar tapno masalbar dagiti pamiliada. Ket pinanawan dagitoy a Hapon ti Vigan nga awan ti kinadamsak a naar-aramid, a kas kadawyan nga ar-aramidenda no panawanda ti maysa a lugar idi panawen ti WWII.

* * *

Gameng ti Vigan. Ita, dagitoy nga antigo a balay ti kangrunaan a gameng ti Vigan, nga isu ti nakaigapuanna a binigbig ti UNESCO a Heritage City iti sangalubongan.

Iti panakaselebrar ti Nailian a Bulan Dagiti Babbai (National Women’s Month) itoy a bulan ti Marso, naipabuya ti nasao a sarsuela iti Vigan Culture and Trade Center (VCTC) idi Marso 5 nga inatendaran ti kakaisuna nga anak da Major Sakai Narioka ken Belen Castillo a ni Mrs. Emiko Castillo Narioka-Lim.

Kuna ni Mayor Medina a ti pannakaipabuya ti sarsuela ket maysa a pammadayaw ken panagyaman dagiti amin nga umili iti Vigan iti pamilia da Major Narioka ken Mrs. Narioka; ken iti pamilia da Major Takahashi ken Mrs. Takahashi ta ti ayan-ayatda ti nangsalbar iti Siudad ti Vigan idi panawen ti Maikadua a Gubat.

Kinuna ni Mayor Medina a dagiti dua a Filipina-Ilokana a nayasawa kadagiti dua a nadakamat nga opisial a Hapon, dua a babbai a bannuar idi panawen ti WWII.

Iti met biang ni Mrs. Emiko Castillo Narioka-Lim, inyebkasna iti napalaus a panagyamanna iti inted ti Vigan a pammadayaw kadagiti nagannak ken ti pamiliana. Impanamnamana pay a mapandanto buyaen a sangapamilia ti nasao a sarsuela inton maipabuya iti Metro Manila.”—O

TI LADAWAN: Maysa nga eksena iti nadakamat a sarsuela.

(No adda kayatyo a maitandudo a talento iti AMianan, agemail laeng iti bannawag.mb@gmail.com.--AST)