WANG-WANG
WANG-WANG laeng.
Dayta kano ti naaramidan ni Pres. Benigno Simeon "Noynoy" Aquino III iti makatawen a panagtakemna a Presidente.
Segun dayta iti maysa nga Obispo manipud iti CBCP (ania koma pay?).
Iti ababa a pannao, dina natungpal dagiti inkarkarina.
Daytoy kano laeng pannakaisardeng ti panagaramat iti wang-wang ti lugan dagiti dadakkel a tattao tapno malusotanda ti trapiko.
Iti biangko, di pay ket ania a makuna nga achievement dayta. Ta kabaelan pay koma nga aramiden ti MMDA.
* * *
Iti biang ni Kaka Juan Al. Asuncion, Literary Editor ti Bannawag, di unay mapagbiliban daytoy "wang-wang" a naaramidan ni Noynoy.
Ta no idiay Ilokos, nayonam la ti "e", delikadon.
Agbalin no kuan a "waeng-waeng".
* * *
Iti biang met ti sabali pay nga Obispo, saan kano a rebbengna a mapagtalkan ti nangato a reyting ni Vice-President Jejomar Binay.
Apay?
Awan kano met pay ti naar-aramidanna.
Iti biangmi met, dayta ti nangpangato iti reyting ni VP Binay.
Kunada iti Ingles, less talk, less mistake.
Ni VP Binay, awan ar-aramidenna, awan met ti maaramidna a madi wenno dakes a mangibaba iti reytingna.
* * *
Ngem gagangay iti sistema ti gobiernotayo a di unay maik-ikkan iti responsibilidad ti bise-presidente (spare part, kuna ngarud ni Bayani Fernando), saan unay nga issue no adda man maaramidan ni Binay wenno awan.
Ti nasken, ti Presidente a mangitungpal kadagiti inkarkarina.
Ngem no kastoyen a medio adu a mata ti maitaltaliaw ken ni Binay, pagilasinan daytoyen a sirsirpatendan no nakasagana met laengen ti "spare part".
* * *
Panguartaan, saan a pagdaksan.
Dayta kano ti ipaay dagiti water lily, segun ken ni TESDA Director General Joel Villanueva.
Maaramid kano dagitoy a sinelas, bag, placemat, sapatos, bay-on.
Ita, mangiwayat iti training ti TESDA tapno masursuruan dagiti umili nga aramiden a pagkuartaan daytoy water lily.
Hm, kayatda a sawen, masapul pay a mayanud met dagiti niog kada kawayan kada uway sa makita ti potensialda a pagkuartaan?
* * *
Dagiti met plastik ti pabasolen ni Sen. Loren Legarda a makagapu iti nasaknap a layus iti Filipinas.
Malaksid iti waterlily, dagitoy ti kangrunaan a nangserra kadagiti estero, kanal ken amin a pagayusan ti danum.
Numona ta saan nga agrupsa ti plastik.
Ita, nangidatagen ni Sen. Loren iti gakat iti Senado tapno maipawil ti panagusar iti plastik kadagiti merkado.
Napintas nga addang daytoy.
Tapno masuktan dagiti plastik iti bay-on a naaramid iti wen, water lily. Ket iramanda iti Linteg a maiparit ti agibelleng iti bay-on a naaramid manipud iti water lily.
* * *
Addan DepEd order a mangibilin iti nasaknap a pannakaikampania ti Palawan Underground River tapno mairaman iti listaan ti N7WN.
Pakaidayawan ti sibubukel a Filipinas no bilang mairaman.
Sapay koma ta isaruno met ti DepEd nga isuro kadagiti ubbing nga ikampania ti panangkontra iti amin a kita ti panangdadael iti Nakaparsuaan, kangrunaan ti panag-logging ken panagminas.
Hunio 29, 2011
Comments
Post a Comment