RICE PLEASE

ADDA kanon iti Top 40 a kabaknangan iti Filipinas daytay akinkukua iti Mang Inasal. Diakon kinita ti naganna wenno no mano ti kuartana ket baka masulisogak a mangkidnap for ransom. Basta ti ammok, kas kuna dagiti kakaduak a padak nga agkatkatay iti apal, mapan a 30-34 laeng ti edadna. Kayatna a sawen, kadasarak. Idinto a siak, marigatanak pay a mapan mangan iti Mang Inasal uray maminsan la ti makabulan.

Ala, narigat met a talaga no siak ti maikompara kenkuana ta saan met a pagbaknangan dagitoy hiligko. Mapanta laengen ken ni Manny Pacquiao. Kasadarak ni Manny (feeling close). Agpadakami a 1978 a nayanak wenno agedad 33 itoy a tawen (siak inton Agosto, isuna inton Disiembre). Manon a tawen a makipinpinnarpar iti rupa ni Manny ken maibilang nga isunan ti rupa ti boksing iti sumagmamano a tawen. Mapmapanen a 30 milion a doliar ti ganganarenna iti tunggal labanna (agtipon ditan ti tangdanna ken bingayna iti pay-per-view; awan ketdi ti pustana). Sa adu metten dagiti negosiona iti Filipinas a pakairamanan dagiti Lotto outlets; ken dagiti maganarna iti anunsio.

Ngem saan a karaman ni Manny kadagiti kabaknangan a Filipino. Isu a diak unay umapal met laeng kadaytoy akimbagi iti Mang Inasal.

Ne, naipaliwaweng metten 'toy sinuratko idinto a "Rice Please" ti paulona daytoy.

Uhm, nakaskasdaaw laeng ti napartak a panaglatakna daytoy Mang Inasal. Phenomenal. Kasla Jovit Baldivino. Wenno Marcelito Pomoy. Barbareng ketdi no saan a gil-ayab iti pan-aw. Sabagay saanton nga aglatak dagitoy dua a singer ti kunak ngem addanto pay laeng Mang Inasal.

Apay?

Umuna, gapu iti Unlimited Rice (o, dadtan ta paulona) a dramada. Am-ammo dagiti Pinoy a managkaan iti innapuy wenno nadagsen a taraon kas iti mais wenno kammotit. Ket no dayta ti idiayam, nga uray mano ti kanenna nga innapuy, ay, ket maay-ayo dayta. Uray ngamin kallamo laeng a Pangasinan padas ket makaibus iti sangakaldero nga innapuy. Daytanto la ketdin tinunot a manok? Ket isu daytoy ti

Maikadua, gapu iti manok nga Inasal (ti Ilonggo term para iti tinuno). Apo ta naal-alana la unay ti panagraman dagiti Pinoy. Tinuno-- panarasan kadagiti Pinoy. Sa pay la manok nga amin san a Filipino, daytoy ti masansan a masida gapu iti kinalana a mataraken (kadagiti taga-away), ken alternatibo ti baboy kadagiti adda iti Manila lalo dagiti naarte a di mangayat nga agsida iti ikan wenno nateng. Sa adda pagisawsawan a toyo, suka (manipuid iti tuba), ken taba wenno manteka. Sa mapis-itan iti sili ken mapespesan iti kalamansi. Uhu. Sa pay la okey ti agkammet. Daytaka. Mamutittit ta kustomer.

Maikatlo, gapu ta naalan ti Jollibee ti 70% a paset daytoy Mang Inasal (ket nalabit daytoy ti kuartan detoy loko nga akimbagi). Ket no naalan ti Jollibee, ipakatda itan ti teknikda a nangpalatak iti Jollibee: anunsio, serbisio, kinaadu a puesto ken panangiserrek iti psyche dagiti Pinoy a no manganka iti Mang Inasal/Jollibee, Pinoyka, in-ka, astig-ka wenno ania pay a a pangbolboladas a gagangayen kadagiti kapitalista.

Ken Maikapat, a kangrunaan, ti panangpasirokna iti Bacolod Inasal nga orihinal ti templa ti inasal a manok (a naglatak idi adda teleserye ni Judy Ann Santos nga "Ysabella"). Basolna ngarud no innalana ti templa ti Inasal ket pinaglatakna iti Metro Manila daytoy Mang Inasal. Ali, bay-amon no awan ti lohikal a koneksion ti "Mang" ken "Inasal". Ti nasisita, ti tinuno a manok a naimas ti sawsawanna ken unlimited rice wenno rice all you can. Adda met piesto ti Bacolod Inasal iti Manila. Ngem segun iti padasko, nabuntogda nga agi-serve ditoy Bacolod Inasal (a rinisut ti Jollibbe style a panagi-serve ti Mang Inasal), ken medio pasosialda.

Malagipko nga idi 2009, di pay unay nalatak daytoy Mang Inasal. Adda pay laeng impapetpet ti Bulletin idi a gift checks kadakami nga empleadoda ket sadiay a rinambakanmi ti kasangay ni Anib iti Hulio. Ket no adda kakastoy a gift gift check, pagilasinan a di pay unay am-ammo ti produktom.

Ngem kas nakunakon, phenomenal ti panaglatak daytoy Mang Inasal. Ita, addan sa iti aminen a suli ditoy Metro Manila, iti abay ti agarup tunggal puesto ti Jollibee. Ken kangrunaanna, addan iti Top 40 ti akinkukua wenno nangirugi itoy nga agarup kasadarak laeng.

Apay a sinuratko daytoy? Palagip kaniak iti maysa nga idea. Restauran met, a. Tinuno met laeng a manok. Unlimited rice met laeng (naim-imas pay ta dagitay aggapu iti Tanap ti Cagayan). Ngem ti pagsawsawan, bugguong a munamon a napettakan iti kamatis ken nagalipan iti lasona. At least, no adda kastoy a puesto, maawis dagiti Ilokano ket isu pay a maikissay iti kinabaknang daytoy akimbagi iti Mang Inasal ken daytoy akimbagi iti Jollibee.

Ania ti mayat a naganna? Hm, madik kayat ti Asseng Inasal. Amangan ta ipagarupda a pagiinuman. Maymayat sa ti Ilokano Inasal. Wenno Inasal Ka Rin.

P.S.
Adda ketdin sabsabali pay nga ilaklako ti Mang Inasal kas iti tinuno a bangus, tinuno a tilapia, shanghai, halo-halo ken dadduma pay.


Hulio 3, 2011

Binulodko laeng 'ta ladawan.