Tunggal Palabsak Dagiti Balikas A Napartuat Gapu Kenka,

Ayat, kasla tantan-awak ti nakalitlitnaw nga ubbog
ket iti lansad daytoy, agtultuloy nga agpussuak
ti nadarisay a danum nga awanan sabali a panggep
no di mangep-ep iti amin a pagayusanna a namaga,
mangpunno iti amin a kawaw, mangpalangto iti amin
nga agkalikagum nga agsantak ken agsampaga;

Kasla palpalabsak ti Nasantoan a Libro
ket patiek a maysaak a propeta
ta makitak dagiti pagilasinan ti yaay
ti Mannubbot, ken maysaak met laeng nga arban
a sumsumga iti pammatalged ti Isasangbay
ti maysa a mangibagnos.

Ket iti kanito a diak mapetpetan
ti pangalkalapkapak a siak, pasetnak
kadagiti parmatam, mariknak nga addaak
iti maysa a naulimek a terminal,
mangkaskastigo iti bagik gapu iti naladaw
nga idadatengko ket diak masinunuo
no pangrugiak a guyoden ti panawen
tapno dumteng manen ti sabali a tren
wenno sabali a posibilidad tapno magteng
ti pagturongan, ta madanaganak a sika
nga adda iti ungto daytoy a panagdaliasat
matektekan ket agturongen iti disso
a diak pulos masierto ken awanan pagilasinan.

No magnaakon nga ima-ima ta maamakak
a mangarikap iti agdardara a barukong
ta awanan-anag ti mangilibut iti kinapiman,
ar-arep-epek a tunggal addangko,
agsubli iti punganay tapno mangrugiak manen
nga agdaliasat agingga a magtengko ti disso
a naginnabel dagiti dalan, a nagsinnaip
dagiti imatang ket nasaysayaat laengen a dita
ti pagpatinggaak ngem iti immaddangak
nga umadayo met kenka.

Ta itan, diak ammo nga ipamuspusan
ti pannakaidanon kenka a sibubukel
daytoy nadarisay a kararuak
a makikammaysa kadagiti amin
a nadarisay ken agsantak
sakbay a tallikudak dagiti bituen...

Hulio 13, 2011