Nalalaing Dagiti Ubbing no Maisuroda iti Nakayanakanda a Pagsasao

Dagiti kameng ti GUMIL CTE a timmulong iti seminar, kaduada dagiti mangisursuro iti MMSU (manipud maikapat agpakanigid, nakatakder): Prof. Edna C. Nagtalon, Prof. Marlina L. Lino; Prof. Lilybeth C. Agno; Dr. Jovenita A. Aragon, Prof. Elma B. Santos, Prof. Imelda L. Najorda ken Mr. General M. Valdez.

KAS sungbat ti pannakaipaulog ti DepEd Order No. 74, series 2009, a mangilunglungalong iti pannakaaramat ti nakayanakan a pagsasao iti panagisuro kadagiti agad-adal manipud Grade I agingga iti Grade III, inangay ti MMSU College of Teacher Education, Laoag City ti agdua nga aldaw a taripnong iti mismo a pagadalan idi Set. 17-18, 2009.
Kangrunaan a panggep ti gannuat ti ad-adda a pannakaipaawat kadagiti mangisursuro dagiti probision ti nasao a pammilin a manamnama a maipatungpal iti sumaruno a tawen-panagseserrek.
Manipud iti Departamento ti Edukasion (DepEd) ken kadagiti Teacher Education Institutions iti Rehion I, agdagup iti 135 dagiti dimmar-ay a buklen dagiti mangisursuro iti Grade I-III, dagiti administrador ken propesor iti kolehio a mangisursuro kadagiti professional education courses. Addada pay Day Care Workers a timmabuno.
Dimmar-ay met ni Dr. Cherrie Melanie Ancheta Diego, chief ti Technical Services Division ti Commission on Higher Education, Region I, kas nangisuno ken ni Dr. Caridad O. Abuan, OIC director. Timmalantan pay ni Atty. Ramon A. Leaño, Vice President for Administration ti MMSU a nangisuno met ken ni Dr. Miriam E. Pascua, presidente.
Indanon ni Dr. Diego ti mensahe ni Dr. Abuan. Ditoy a kinablaawan ni Dr. Abuan ti MMSU-CTE iti panangidaulona iti daytoy a gannuat. Kinunana pay iti mensahena a mangnamnama a no Iluko ti mausar iti panangisuro, “ad-adunto manen a bannuar, nasaririt nga agserbi ken mangidaulo.”
Iti met biang ni Atty. Ramon Leaño, indagadagna met ti panagusar iti Iluko. Kas kenkuana ken dagiti kataebna, naisuroda iti Iluko iti umuna a tukad ti pagadalan.
Adtoy dagiti nagsarita iti MLE Orientation:
Dr. Jaime G. Raras, research coordinator ti University of Northern Philippines, Candon City campus (“Ti Panagdur-as ti Ilokano kas Nailian a Pagsasao”);
Dr. Cecilia P. Aribuabo, Schools Division Superintendent ti Division of Ilocos Norte (“Dagiti Kangrunaan a Sagudayen ti DepEd Order No. 74. series 2009”);
Prof. Marlina L. Lino (“Dagiti Rason no Apay a Nalalaing dagiti Ubbing a Filipino no Agusarda iti Bukodda a Lengguahe”);
Mr. Reynaldo E. Andres, mannurat ken kameng ti Ilocos Agricultural Resources Research and Development Consortium (ILARRDEC) iti MMSU (“Ortograpia ken Grammar ti Iluko”);
Dr. Estrella R. Calixto, Research Director, Northwestern University, Laoag City (“Nadumaduma nga Estratehia iti Panangisuro ti Panagbasa”);
Mr. Joel B. Manuel, prinsipal ti Banna National High School, Banna, Ilocos Norte (“Panagsurat iti Sarita a Para Ubbing ken Panangaramid iti Giya ti Panagbasa”);
Prof. Rose Francis E. Mina, MMSU-CTE BEEd Department chair (“Dagiti Konsepto ken Panagkanaig ti Panangisuro ken Teknolohia”); ken
Dr. Alegria T. Visaya, University Secretary ken chief ti Center for Ilokano-Aminanan Studies (CIAS), MMSU (“Resulta ti Panagsukisok a Mangipaneknek a Nalalaing dagiti Ubbing a Naisuro iti Nakayanakanda a Pagsasao”). --Edna C. Nagtalon, Coordinator

(Naipablaak iti Bannawag, Nobiembre 2, 2009, panid 21.)