GSR,* teddek Literatura Ilokana, iti kappia ti Dios Apo, inka aginana

Ket iti ipapanaw ni Dr. Reyes, pagtamdan nga ama,
Palubosandak mangidaton sumagmamano a linia;
Iti Manangngaasi, Naparabur nga Ama a Nailangitan,
Para iti malalaki a Mannaniw Laureado ti Kailokuan:

O Apo a Dios, iti isasangbay ni anakmo a Godo,
Awatem kadi ‘diay dua nga imana tapno di masdo,
Umay Kenka Ama a Mannakabalin aginana,
Sika nga adda’t langit, ubbog adu a liwliwa.

Ania man dagiti nakitam nga inna nagkurangan,
Apomi a Dios yetnagmo koma ti pammakawan;
Iturongmo, Apo, ti inna pagtugawan dita langit,
Tapno awantot’ sumangpet kenkuana a saniit.

Alaem dita pagariam, O Amami a Manangngaasi,
Ni adipenmo a Godo, pagtangtangsit Ilokano a puli,
Itedmo kenkuana napardas a pammendision,
Ket itedmon, Ama, iti anakmo nabang-ar a parbangon.

Kas politiko, mangisursuro, mannurat ken mangngagas,
Imbukbokna amin a talugading nga awan labas,
Adut’ tinultulonganna a kakabsat ken kakailian
Tapno iti kalgaw wenno nepnep dida mayaw-awan.

Idi isu ti nangrienda iti gunglo dagiti Ilokano a mannurat
Awan nagari idi a kinnusilap, pinnateltel ken tinnagbat,
Nakitada iti takder ni Doktor Godo, kadagiti bukodna a mata
Nga adda dakdakkel nga arakupen a sirmata ken parmata.

Kas maysa a geriliero inna met impasimudaag
Ti ayatna iti ili ken kakailianna ket ngarud di naguldag;
Tinulonganna pay dagiti addaan di masantiguar a sakit,
Ta dina kayat nga isuda di agpatingga a masapsaplit.

Iti ili a nakayanakanna ken iti bukodna a pamilia
Imparangarangna ti kalidad karakter ken kinataona,
Tawid dayta a sigurado a pagdidinnamagan
Dagiti adu a kaputotan ti Rehion a Kailokuan.

Adunto dagiti maisurat maipanggep iti daytoy nga ama,
Isu a nangibati kadagiti nasasantak, nalangto a parmata;
Adunto dagiti lagip a mauk-ukarkar iti agpatnag, agmalem,
Ket ni Doktor Godo, sibibiag latta iti labes ti tanem.

Ket ita, Ama, Sika a Kangangatuan a Mangngagas,
Kadakami nga inulilana dayta Imam Inka koma idapnas,
Tapno kad’ metten saibbek barukongmin agtukeng,
Dios Apo, iti dawatko koma Saanka nga agaleng-aleng.

Dayta Imam, Apo, iti kapisi ti pusona Inka ikallabay,
Ket punasem kadin ‘diay di masneban nga anek-ek ken liday,
Iturongmo kadi dagiti matana iti langit, iti Pagariam,
Tapno nungkanto, kalpasan ti sipnget, di mayaw-awan.

Apo, taklin dagiti amin nga addan nadagsen a sennaay,
Apirasem kadi ‘diay pusoda ket isanengmo ni linglingay;
Ipariknam a daras kadakuada a dita langit agin-inana,
Ni Godo nga anakmo, baton-rimat ti Literatura Ilokana.

HONOR BLANCO CABIE
--Pinili, Ilocos Norte

*Dr. Godofredo S. Reyes, Presidente, GUMIL Filipinas, 1976-1989