Baro nga Album da Vhen ken Mikaela

Inruar ti Aquarius Records ti kaudian a CD album ni Vhen Bautista, ti Prince of Ilocano Songs, a nakabase itan idiay California. Napauluan ti album iti “Estoria ti Biag”, naisangsangayan ti CD ta kadua ditoy ni Vhen ti balasitangna a ni Mikaela Vien. Adda pay partisipasion ni Ernie Bautista, ti nalatak a radio anaunser ken toastmaster idiay Hawaii a maysa met laeng a recording artist babaen ti The Two of Us Band a pagkaduaanda ken Ping "Mr. Guitarman" Lopez.

Kinuna ni Vhen a nabayag a nainaw ti panagkaduada iti maysa nga album iti anakna ngem gapu iti pannakakumikomna iti adu a concert-na idiay US ken iti panagbasa ni Mikaela, nabayag a naitantan daytoy. Itay laeng Mayo a panagbakasion ti sibubukel a pamilia ni Vhen iti Filipinas manipud iti California, USA, a pagnaedandan ti kaadda ti gundawayda a nangirekord kadagiti kanta a nairaman iti album.

Nakaay-ayat, kuna ni Vhen, ken makapatibker iti nakem, ta uray idi di pay nairekord iti studio dagiti kanta ni Mikaela, nagbalinen a most requested song dagitoy iti programa da Benny Guiang Rieta (“Kumpletos Rekados ken Murmuray iti Hawaii”) ken Edna Butay (“Edna's Afternoon Delight”) iti KPHI AM Radio ken iti programa ni Ernie Bautista a “Filipino Fiesta” iti KNDI Radio.

Iti konsierto da Vhen ken Mikaela iti Quinarayan, Narvacan, I.S. ken iti Claveria, Cagayan idi Mayo, impamatmat ni Mikaela a tinawidna ti laingna nga agkanta iti amana. Natarus nga agbalikas iti Iluko/Ilokano. Iti met Ingles, kabaelanna pay a kantaen dagiti kanta ni Celine Dion, banag a nangraemanda kenkuana. Adu ti nangipatdo nga adayo ti magteng ni Mikaela iti lubong ti musika.

Nagdueto dagiti agama iti kanta a “Kastoy ti Biag iti America” ken “Dumngegka Man Bassit”.

Adu ti rason no apay a pinili ni Vhen nga “Estoria ti Biag” ti paulo ti album. Iladladawan ngamin ditoy ti kabibiagda ken Ross a kaingungotna babaen ti kanta a “Faithful and Endless Love”, ken iti pannakainaw ni Mikaela iti kanta a “Maladaga”. Iti kanta a “Tatang, Nanang”, iladawanna ti biag ti agassawa, “Sangkasapulan, Sangkaapuyan”, iparangna met ti rigat ti biag ti agassawa a mangisakad iti annakda. Ken adu pay a sabsabali a kanta a kas iti “Hanalei Valley” a naputar ni Vhen kalpasan ti naminsan a panagpasiarda iti Kauai. Nainspirar idi makitada ti nalawa a tanap a namulaan iti taro wenno aba a kukua gayam ti maysa a kadaraan a taga-Dingras, Ilocos Norte, ni Flora Quick.

Ti Aweng Productions USA ken BLB Records iti Hawaii ti producer ti album. Agyaman da Vhen ken Mikaela kadagiti sumaganad a timmulong iti pannakairuar ti album: Danny Velasco, Chamile Misay serrano, Jun Velasco, Mr. & Mrs. Frederick Guerrero (Maui), Irene Allen (Michigan) para iti pictorials, Emmie Anderson, Florida Isla, Mr. & Mrs. Greg & Betty Canto, Atty. & Mrs. Christopher Hernandez, Celso Cabanit, Engr. & Mrs. Reynaldo Canto, Freddie Boy Tan ti DWRS, Ruben Ballesteros ti DZNL, Dhan Langaman ti DZRL, Leo Agcolicol ken Boboy P iti KNUI Maui, Ronald Valdriz ti DWFB, Mr. & Mrs. Norman Leano, Mila Turda Gonzales, Andy Barroga ti Iluko.com, kdp.

Nai-launch ti album idi Mayo 22 iti NL Resort Centro 6, Claveria, Cagayan ken naipabuya iti Cable TC iti Cagayan babaen ti Suniga Sharp Studio Video Productions.
Magatang ti album iti amin nga SM Records outlets iti Filipinas ken iti amin a sanga ti North Star iti Honolulu babaen kada Edna Butay, Ernie Bautista, Carlynee Esteban, ken Flora Quick iti Kauai.--O

(Naipablaak iti Bannawag, Agosto 24, 2009, p.38)