Estudiante iti Union Christian College, Umuna a Gunggona iti pasalip ti TESDA

Da First Prize winner Maria Lourdea Arizala ken Second Prize winner Sonny A. Vila (maikadua ken maikatlo manipud iti kanigid), a binayabay da TESDA Region I Director Washington Agustin, Ed H. Angco, TESDA-LU PD Marissa Alcantara, GLU Pres. Djuna Alcantara ken Danilo B. Antalan. Awan iti ladawan ni Ruby Ann Aquino a Third Prize winner. (Rinetrato ni Weny Cacho, Jr.)




Inyalat ni Maria Lourdea A. Arizala, 18, adda iti maikapat a tawenna iti kursona a Nursing iti Union Christian College iti Siudad ti San Fernando, La Union ti Umuna a Gunggona (P10,000.00) iti Salip iti Sarita para kadagiti estudiante iti haiskul, kolehio ken tekbok (teknikal-bokasional) nga inwayat ti Technical Education and Skills Development Authority (TESDA) Region I ken GUMIL La Union itoy a tawen.
Tubo iti Bauang, La Union ni Blsng. Arizala.

Nagun-od met ni Sonny A. Vila, 39, estudiante iti tekbok a taga-Pasuquin, Ilocos Norte ti Maikadua a Gunggona (P7,000.00); Maikatlo a Gunggona (P5,000.00) met ken ni Ruby Ann Aquino, 17, estudiante iti Nursing iti Don Mariano Marcos Memorial State University iti Agoo, La Union.

Pito pay a dadduma a nakisalip ti naipaayan iti pangliwliwa a gunggona a sag-P1,000.00, da: Alma P. Martinez, Juditha A. Tipallo, Daisy Villena Caranay, Emily G. Tabbal, Raul F. Hadap, agpapada nga estudiante iti University of Northern Philippines-Candon City Campus; Zaldy Hernaez, estudiante iti tekbok iti Bacarra, Ilocos Norte; ken Irenio T. Ople II, 14, 3rd year high school student iti Felkris Academy iti Siudad ti San Fernando.

Ni TESDA Region I Director Washington M. Agustin ti nangyawat kadagiti premio a tseke ken sertipiko kadagiti nangabak iti seremonia a naangay iti regional conference room ti TESDA idi Agosto 27.

Nagpaay a hurado itoy a salip da Danilo Antalan, Joel Manuel ken Ed Angco. (Djuna R. Alcantara)

(Naipablaak iti Bannawag, Setiembre 21, 2009, p.35)