Doble Tres: Awanen ti Kas Kadakuada a Nabukelen
Awanen ti Kas Kadakuada a Nabukelen
Saan met a mabuteng ni nanangko ken ni tatangko
Wenno ni tatang ken ni nanang
Ngem agingga ita, masmasdaawak
Nga iti laksid a nagpatinggada laeng iti elementaria
Ammoda ti arte ti panagsubang, wenno panagrinnisut
Iti di panagkinnaawatan
Kas iti naminsan nga adda dagiti bisitami
Nga inlutuanda pay iti tinola a manok
Pinaunadakamin a nangan
Idinto nga isuda, napanda nagabay iti bangko
Iti sirok ti kalapaw iti likudan ti balaymi
Nagpatpatangda iti nakapsut
Sa kalpasanna, naggidandan a nangan
Idi makapangankami
No adda man kayatko laeng nga isingir
Ken ni tatang, ti dina panangisuro kaniak
Nga agarado nupay ti rasonna, namin-anon
A dinagullitna: diak kayat a maay-ayoka
Nga agarado ket saankan nga agbasa.
Agsabali kano ti lubongmi. Pammatina dayta.
Ngem kaniak, maymaysa. Gapu ta ti anusna
A gumatgatang iti linawas a Bannawag,
Nasapa nga impategko dagiti maisurat a balikas
Ken impategko isuna a makaanag
Kadagiti napapateg nga adal a nakalanad
Iti nasao a magasin
Mabalin nga agsabali dagiti nagyan ti ulomi
Isuna kadagiti bambanag maipanggep iti agrikultura,
Dagiti nagnagan dagiti ayup, tumatayab ken ruruot
Idinto a siak, dagiti bambanag a saanna met a pagkurangan
Uray diakon ibaga kenkuana ta iti kanito nga aramidek
Mangparpartuatak laeng iti nalayog a pader
Iti nagbaetanmi. Ay, kaykayatko daydiay buya
Nga iti maysa a naladaw a malem, adda bekbekkelenmi
A red horse ket pasaray pumidotkami iti napalkang a nasilian a kaggo
Iti lamesita iti sangomi bayat a buybuyaenmi ti panangalun-on
Ti laud iti nakalablabaga nga init ket es-estoriaenna
No kasano ti kabun-as dagiti aggipin a pagayna
Ket pasaray saludsodenna no naguapo pay laeng agingga ita
Dagiti editor ti magasin idi tiempo nga ibasbasana pay laeng
Kadakami ken dagiti kakabsatko dagiti sinuratda.
Iti sabali a bangir, naynay a sumgaak kadagiti nairut
Nga arakup ni nanangko nga iti ibabattaway ti panagbakasionko
Umir-irut met nga umir-irut a diak malagip no kaano a nangrugi
Daytoy panangarakupna kaniak— no diak mariro, kalpasan
A naoperaanak iti puso. Ta idi ubingak, tunggal aggurigorak
Ung-ungtannak bayat ti panangbambaniosna kaniak;
Wenno sao a sao bayat ti panangsallabayna kaniak
A mangitulod iti eskuelaan. Naynay ketdi a malagipko
Daydi panangtengngelna iti bullakayan a kaeskuelaak
A nangpusi iti ngipenko ket imbagana a padasek met
A pusien ti ngipen daytoy (diak inaramid, a,
Ta kasanonton inton awan isuna a mangtengngel?).
Masansan a pampanunotek, a no nagloklokoak koma,
Addaak pay laeng iti sidongta ket masusungegak la ketdi
Iti awan-sardayna a panangibagada iti kinalanggongko.
Ngem gapu ta dinengngegko dagiti balakadda,
Addaak iti adayo, ket bilbilangenda ti tunggal aldaw
Nga awanak iti sibayda— mailaak ta ad-adun nga amang
Ti kaawanko ngem ti kaaddak iti sibayda a patiek
Katalinaayan a disso ditoy lubong.
Agosto 6, 2011
Saan met a mabuteng ni nanangko ken ni tatangko
Wenno ni tatang ken ni nanang
Ngem agingga ita, masmasdaawak
Nga iti laksid a nagpatinggada laeng iti elementaria
Ammoda ti arte ti panagsubang, wenno panagrinnisut
Iti di panagkinnaawatan
Kas iti naminsan nga adda dagiti bisitami
Nga inlutuanda pay iti tinola a manok
Pinaunadakamin a nangan
Idinto nga isuda, napanda nagabay iti bangko
Iti sirok ti kalapaw iti likudan ti balaymi
Nagpatpatangda iti nakapsut
Sa kalpasanna, naggidandan a nangan
Idi makapangankami
No adda man kayatko laeng nga isingir
Ken ni tatang, ti dina panangisuro kaniak
Nga agarado nupay ti rasonna, namin-anon
A dinagullitna: diak kayat a maay-ayoka
Nga agarado ket saankan nga agbasa.
Agsabali kano ti lubongmi. Pammatina dayta.
Ngem kaniak, maymaysa. Gapu ta ti anusna
A gumatgatang iti linawas a Bannawag,
Nasapa nga impategko dagiti maisurat a balikas
Ken impategko isuna a makaanag
Kadagiti napapateg nga adal a nakalanad
Iti nasao a magasin
Mabalin nga agsabali dagiti nagyan ti ulomi
Isuna kadagiti bambanag maipanggep iti agrikultura,
Dagiti nagnagan dagiti ayup, tumatayab ken ruruot
Idinto a siak, dagiti bambanag a saanna met a pagkurangan
Uray diakon ibaga kenkuana ta iti kanito nga aramidek
Mangparpartuatak laeng iti nalayog a pader
Iti nagbaetanmi. Ay, kaykayatko daydiay buya
Nga iti maysa a naladaw a malem, adda bekbekkelenmi
A red horse ket pasaray pumidotkami iti napalkang a nasilian a kaggo
Iti lamesita iti sangomi bayat a buybuyaenmi ti panangalun-on
Ti laud iti nakalablabaga nga init ket es-estoriaenna
No kasano ti kabun-as dagiti aggipin a pagayna
Ket pasaray saludsodenna no naguapo pay laeng agingga ita
Dagiti editor ti magasin idi tiempo nga ibasbasana pay laeng
Kadakami ken dagiti kakabsatko dagiti sinuratda.
Iti sabali a bangir, naynay a sumgaak kadagiti nairut
Nga arakup ni nanangko nga iti ibabattaway ti panagbakasionko
Umir-irut met nga umir-irut a diak malagip no kaano a nangrugi
Daytoy panangarakupna kaniak— no diak mariro, kalpasan
A naoperaanak iti puso. Ta idi ubingak, tunggal aggurigorak
Ung-ungtannak bayat ti panangbambaniosna kaniak;
Wenno sao a sao bayat ti panangsallabayna kaniak
A mangitulod iti eskuelaan. Naynay ketdi a malagipko
Daydi panangtengngelna iti bullakayan a kaeskuelaak
A nangpusi iti ngipenko ket imbagana a padasek met
A pusien ti ngipen daytoy (diak inaramid, a,
Ta kasanonton inton awan isuna a mangtengngel?).
Masansan a pampanunotek, a no nagloklokoak koma,
Addaak pay laeng iti sidongta ket masusungegak la ketdi
Iti awan-sardayna a panangibagada iti kinalanggongko.
Ngem gapu ta dinengngegko dagiti balakadda,
Addaak iti adayo, ket bilbilangenda ti tunggal aldaw
Nga awanak iti sibayda— mailaak ta ad-adun nga amang
Ti kaawanko ngem ti kaaddak iti sibayda a patiek
Katalinaayan a disso ditoy lubong.
Agosto 6, 2011
Comments
Post a Comment