Doble Tres: Panangpapatay Kadagiti Lagip
Panangpapatay Kadagiti Lagip
(Dispensar iti Franco)
Sabagay, ti kas kaniak met laeng nga addaan
Kadagiti di narisut a parikut wenno agbabawi
Kadagiti inar-aramidna ti seknan ti kastoy a panagraas:
A no koma adda pangibodegaan kadagiti lagip
Ket mapagbalin met daytoy a retaso ti landok ken yero,
Binuot a karton wenno papel, dagiti nagalusan a ramramit
Nakalaklaka a puorak ket an-anusak koman a tugtugawan
Iti pagbaludan ti babakko wenno addaak pay ketdin
Iti sanitarium ta awan metten ti nagyan daytoy ulok.
Wenno maysa koma nga agaagab daytoy a lagip
Ket nairanaak a nakaimatang iti dayta a krimen,
Awanan panagduadua, asutek ti paltog a nabayagen
Nga insalsalikadko para itoy a gundaway ket deppelak
Ti pispisna, maiwaris ti utekna iti kalsada tapno iti kasta
Maballaagan dagiti sabsabali pay a lagip nga agkumegda
Lattan iti napalabas, maitanemdan iti kamposanto ni tagilipat.
Uray maysa koma ketdi a managkunniber a politiko, nay,
Ket adalek amin a wagas no kasano a makautibok
Uray pay kumtat iti bala ti luganna a nangina
Kas itoy: mangimulaak iti bomba iti debuton a sinsinan-kotse
Ket pakamatak ti luganna, sumirok ti ay-ayamko
Iti napintas a lugan ket iti maysa a pis-it, nakabalesen
Dagiti umili a kinuskusit ken minaymaysaanna.
Ngem kasano a mapapatay no kas kuna ‘tay maysa a mannaniw,
Apagbiit a dumiklawit ngem nabileg? Ket nayonak: masansan
A naulpit, awanan-asi, di mangipirpirit, mangtirtiris…
Ta masansan, agsubli daytoy iti ayamuom dagiti sabong,
Kadagiti salemsem tunggal nadagaang ti sardam,
Kadagiti naiwaris a bituen kadagiti nasipnget,
Agmaymaysa a panagdaliasat ket dimo maliklikan
Ti agpaaklulo kadagiti naririmat a lawagna…
Agosto 12, 2011
(Dispensar iti Franco)
Sabagay, ti kas kaniak met laeng nga addaan
Kadagiti di narisut a parikut wenno agbabawi
Kadagiti inar-aramidna ti seknan ti kastoy a panagraas:
A no koma adda pangibodegaan kadagiti lagip
Ket mapagbalin met daytoy a retaso ti landok ken yero,
Binuot a karton wenno papel, dagiti nagalusan a ramramit
Nakalaklaka a puorak ket an-anusak koman a tugtugawan
Iti pagbaludan ti babakko wenno addaak pay ketdin
Iti sanitarium ta awan metten ti nagyan daytoy ulok.
Wenno maysa koma nga agaagab daytoy a lagip
Ket nairanaak a nakaimatang iti dayta a krimen,
Awanan panagduadua, asutek ti paltog a nabayagen
Nga insalsalikadko para itoy a gundaway ket deppelak
Ti pispisna, maiwaris ti utekna iti kalsada tapno iti kasta
Maballaagan dagiti sabsabali pay a lagip nga agkumegda
Lattan iti napalabas, maitanemdan iti kamposanto ni tagilipat.
Uray maysa koma ketdi a managkunniber a politiko, nay,
Ket adalek amin a wagas no kasano a makautibok
Uray pay kumtat iti bala ti luganna a nangina
Kas itoy: mangimulaak iti bomba iti debuton a sinsinan-kotse
Ket pakamatak ti luganna, sumirok ti ay-ayamko
Iti napintas a lugan ket iti maysa a pis-it, nakabalesen
Dagiti umili a kinuskusit ken minaymaysaanna.
Ngem kasano a mapapatay no kas kuna ‘tay maysa a mannaniw,
Apagbiit a dumiklawit ngem nabileg? Ket nayonak: masansan
A naulpit, awanan-asi, di mangipirpirit, mangtirtiris…
Ta masansan, agsubli daytoy iti ayamuom dagiti sabong,
Kadagiti salemsem tunggal nadagaang ti sardam,
Kadagiti naiwaris a bituen kadagiti nasipnget,
Agmaymaysa a panagdaliasat ket dimo maliklikan
Ti agpaaklulo kadagiti naririmat a lawagna…
Agosto 12, 2011
Comments
Post a Comment