Doble Tres : Sumagmamanon a tawen ti naglabas

Sumagmamanon a tawen ti naglabas

Nupay di nadnadlaw kas iti kinagagangay ti panagtubo
Ken pannakapuri dagiti dungon, mangga, ipil-ipil, kawkawwati,
Wenno panaglangto ken pannakaregreg dagiti bulong
Wenno pannakayanak dagiti maladaga, kunak man laengen,
Ken ipupusay dagiti nataengan nga iti naudi a panagbayagko ditoy,
Saanda pay met nga aglanglanga nga asidegdan a pumusay.

Ngem addada latta naayat iti tong-it ken hueteng; addada
Naayat iti hiniebra (gsm blue ket itan nalabit gapu ken ni anne curtis)
Ket nasossosial ken natartaraki la bassit ti agmalmalem nga agbartek.

Addada ketdi naayat latta nga agmulamula iti bangkag;
Addada naayat nga aganup; addada naayat a mangmitir
Kadagiti naayat iti tong-it, hueteng ken hiniebra.

Immadu metten dagiti traysikel ket siempre, immadu metten
Dagiti masulit a magmagna (ta mabainda met a makantiawan
A ti la gayamen naabak idi kalman iti tong-it ken hueteng
Ti kuartada, piman). Immadu metten dagiti ubbing
Ta nalabit dagiti awan pakitong-itda, kaykayatda
Ken dagiti babbaketda ti agtong-it iti balayda ket ammom laeng,
Ti maabak ket mauyos ti bado sa ti sapin, sa kalson wenno kalsonsilio.

Immadu metten dagiti diak am-ammo a nalabit ad-adu payen
Ngem dagiti dati nga am-ammok nga adda itan iti abrod
Wenno iti sabali a disso, ket dagiti annakda, karaman
Kadagiti nadlawkon nga immadu nga ubbing.

Immadu dagiti dadakkel a balay; immadu dagiti sinsinan
Balay; immatiddog dagiti sementado a kalsada; limmawa
Dagiti natatapok a kinelleng; immilet ti nagbabaetan dagiti balay
Ken ubbing, ken innipis ken numero ken rupa dagiti nabartek.

Diak la masinunuo kadagitoy naariangga nga agtutubo
Kadagiti kalsada, basketball court, tianggi no adda met uray
Maysa wenno dua nga agpampanunot iti kas iti napanunot
Dagiti pimmanaw, nga iti ipapanawda, maamiris koma
Dagiti nabati nga adda koma met panagbalbaliw ti aglawlaw
Ta dagiti pimmanaw, sierto nga adda nagbalbaliwanda,
Iti man langa wenno panangsirpat uray saandan nga agbatay
Iti tuktok ti turod ti bario tapno maanag nga agrukbos ken marsaak
Dagiti kayo uray awanda; agsampaga ken agrupsa dagiti sabong
Kas kadagiti sabsabong iti labes dagiti nalalayog a niog
Iti laud a pagtabonan tunggal malem ti nalabaga nga init
Sakbay pay ti panagsisina dagiti nagtotong-it ken nagbabartek.

Agosto 9, 2011