DOBLE TRES: Siak ni Asseng

Siak ni Asseng.

Ilokano. Ama. Pagayam. Gagangay nga umili.

Agparpartuat kadagiti musika ken balikas
Nga inawagak iti daniw nupay iti panagraman
Dagiti masisirib iti lubong, awanan-anag
A pangbulbulataw iti bukodko a kinabagtit.

Naanusak laeng a mangisursurat kadagiti amin
A maanag, maimatangan, maduktalan
Ken mapadasak nga awanan panangtubngar
Ti bukodko a kananakem ket saan met
A mangkastigo kadagiti nauneg a pannaturogko
Ta dagiti batibatko, dagiti diak pay naisurat.

Kangrunaanna, diak mamati nga agsina
Ti kinapudno iti bagi ken ti pammateg iti kaamaan ken puli
Ta iti kanito a masair dagiti patpatgek kadagiti isursuratko
Saanko ida a patpatgen ketdi us-usarek ti kabaelak
Tapno makabalesak kadakuada a pagilasinan
Ti maysa a nalupoy a parsua. Ta apay nga umadayo
Tapno ibando iti lubong ti aniaman a maanag
A nagkamtudan ti naggapuanna?

Ngarud, nalawag iti nakem ken panunotko
Nga isursuratko ti amin nga adda iti kaunggak
Tapno uray sadino ken asino ti pakadandanonak
Maysaak nga agsarsaragasag a kararua
Nga awanan iti nabuyok a bagahe.

Wenno ibagak iti kastoy gapu ta kinalupkopakon
Iti pammateg ti ania man a pungtot wenno pauyo?

Daytoy a sinurat, saan a makapatar iti pagrukodan
Ti sangalubongan a daniw. Ngem gapu ta mamatiak
A mannaniwak, awagak daytoy iti daniw
A pangipeksaak nga uray ania ti mapaspasamak
Agsuratakto latta iti uray ania ken iti uray
Ania a wagas. Nangruna no ti gapu ti panagsursuratko
Ket kayatko a makasasao ti bagbagik, ken kayatko

Nga adda met pangliwliwak kadagiti mangipatpateg
Kaniak. Nangruna ket agtawenakton iti doble tres.

Agosto 6, 2011