Doble Tres : Panangsapul iti Mutia

Panangsapul iti Mutia

Nalaka koma ita ta panagtutudo
Ket uray ania iti arimukamok, arbis,
Bayakabak, littugaw, uraro
Agpapadada a mamagtipon iti langit
Ken daga

Sa masansan pay ti gurruod ken kimat
A mangtignay kadagiti uong a lumtuad
Wenno mangriing kadagiti sanga
Ken mamaglangto iti kapanagan

Uray ti lakaddongan a pader wenno simbaan
Agtubo dagiti babassit a mula
A mangipakdaar a narigat a tungdayen
Ti asino man nga agkalikagum nga agbiag
Ken mangiparikna iti panagibi ken dungngo

Ket nupay pabor ti kalgaw iti panagtingra
Dagiti maris, agbusel latta dagiti sabong
Uray kadagiti disso a di adakan ti agayan-ayat

Ngem addaak nga agmaymaysa kadagiti taaw
Ti tao, arimbangaw ken panagdidinniskutir,
Agsapsapul…

Daytay an-anib koma a yaspili iti barukong
Wenno siding a pagtubuen iti pispis
Wenno sampaga nga ilalaen iti dakulap
Wenno ti mangkompleto iti paragpag
Wenno aningaas a kaliwanliwa ti kararua
Daytay bituen nga uray kadagiti naulep a rabii
Diak mapukaw gapu ta ammok a silsilnagannak
Wenno baggak a murmuray tunggal agsapa

Ngem pudno ti sariugma dagiti nataengan
A saan a kas karina a tiliwen ti babato ti alipugpog
Ti mangsippaw iti mutia ti sabunganay
Wenno mangipupok iti panio ti layap
Wenno ti maregreg a ngipen ti kalantangan
Ti mangikarga iti di nagkeppet a bulong ti baimbain
Iti botilion ti lana ti gulimba a nasinglag iti Biernes Santo

Ket ania koma ti tallugadingko, wenno pagkaritko
Tapno ti rosas wenno lirio agsampaga iti kaunggak
Ket ipaayda amin nga ayamuom, pusaksak, talinaay,
A sapsapulek tapno mapnekakon itoy a lubong?

Malaksid nalabit no isibogko ‘toy nakapimpiman
A darak iti daga a pinilina a pagtubuan, lumangtuan

Ay, no daytoy a mutia, maysa nga anghel a naregreg
Gapu’t panangimdengna kadagiti ararawko,
Nakaimatang iti panagparintumengko,
Pakaidayawak ti mangagas kadagiti garumiadna,
Mangilatang iti nabatbati a kabaelan a mangaramid
Iti paraiso a nadadaeg nga amang ngem iti tinallikudanna
A langit…

Agosto 13, 2011